“Ne yen tuah keto Nanak Bagus muah Nanak Ayu, pakayunane, nah kema mulih. Nanging keto, di jalan yen Nanak Bagus muah Nanak Ayu nepukin apa-apa, dan pesan majejangkit”.
Kacrita mangkin mamargi ida mantuk, turmaning margi mamanggih ida mica ngaba kendang sambilang ipun ngigel. Kenginan lali ida Prameswari ring pangandikan Ida Betara, punika raris kakayunang antuk Prameswari ring rakane, reh tawah, mica ngaba kendang.
“Beli Agung, Beli Agung, tiang meled pesan, teken micane ento ane ngaba kendang. Rerehang ja tiang punika mangda keni!”’Dados ngandika Ida Sang Prabu,
“Ye to Adi Agung, Adi Agung. To dadi Adi Agung engsap tekan pangandikan Ida Betara i tuni. Jani gantin Adi Agung lacur.” Sausan ida sareng kalih mabaos sapunika, dados ical micane makta kendang punika. Reh sapunika dados ngraris mantuk Ida Sang Prabu sareng Prameswari. Ajahan sampun rauh ring Daha.
Tan kacritanan, mobot sampun Ida Prameswari, tur ring ampune tutug ulanan bobote, raris nyungkan. Suwe sampun nyungkan taler ten embas punika putrane, raris ngandika Ida Sang Prabu,
,,Neh yen I Dewa ngelah pianak luh, masanggup tiang mapag ben munyin bedil teken munyin kulkul, pitung dina makelone. Keto masih igel-igelan pitung dina.”” Wau sapunika, dados embas oka mica, dados matur Prameswari ring Ida Sang Prabu,
‘‘Nah to Beli Agung, dados sapunika dados putrane mawarna Mica.” Kenginan ngandika Ida Sang Prabu ring rabine,
“‘Nah apa keto tiang, tiang suba nurah kakene, reh Adi Agung majejangkit.” Malih ngandika Sang Prabu,
“Neh yen tuah keto, jalan kutang jani ka alase, apan mica” Dados kanikain parek-parekane mangda ngiring ka alase, minakadi Punta, Patih, tur mamargi raris ka alase, ka alas Dahane.
Kacrita sampun rauh ring alas, drika raris kakaryanang kubu tur kaicen panyeroan Ngemban, Ngnte. Sasampune puput kubu punika, kakaonin mantuk antuk Gusti Patih sareng I Punta. Kacrita ring Daha, sami pararatune rauh madelokan mrika, antuk Prameswari madue putra. Raris drika sameton-sametone sami, dados Prameswari nganikaang putrane sampun seda. Reh putranidae kocap sampun seda, raris sami tamiune budal.
245
