2.14 SAMPI WADAK C
2.14.1 Teks
Sampi Wadak C
Ada kone tuturan satua, aji keteng mudah aji dadua maal, Sang Prabu di Daha sedek maburu kalase, ditu ida mamanggihin batu gede tur lengser. Angob pesan ida ngaksi buat kamelahan batune ento, kabaos pantes pesan nongos di bancingah. Ditu lantas ida ngandika, maiseng-isengan teken I Patih Gajarudeh,
“Th Iba Patih, nyen ja nyidaang ngaba batune ene ka bancingah nira masanggup ngupahin I Nanak Galuh’’. Wus ida maburu lantas ida mantuk ka puri Daha. Dugas Ida Sang Prabu sauh pangandika keto, ada kone sampi ningeh pangandikanidane. Sampine ento maadan I Sampi Wadak. Buin maninne lantas surunga kone batune ento, abana ka bancingah. Ida Sang Prabu marah ngaksi ada batu anek pecak kaaksi di alase, angob kone ida kemper di kayunan. Jani teka kone I Sampi Wadak saha atur,
“Inggih Ratu Sang Prabu puniki titiang makta batune, sane mangkin titiang nunas anak Cokor I Dewa sane mapesengan Raden Galuh’’. Sakadi tuek kocap pakayunan Ida Anake Agung mara miarsaang atur I Sampine keto. Ada kone parekan madan I Bayan kapangandikaang mayasin apang nyak mawarna I Gauh. Sasubanne pragat I Bayan mapayas lantas ngandika kone Ida Sang Prabu,
“Ih iba Sampi Wadak, ne I Nanak Galuh, kema suba ajak!” Matur lantas I Sampi Wadak,
“Inggih Ratu Sang Prabu puniki boya ja I Raden Galuh, puniki I Bayan, sampun Cokor I Dewa adua, yan Cokor I Dewa pacang micaang jagat Dahane kalih purine puniki pacang borbor kalih nyagang titiang’’. Klintang sungsut kayunidane Sang Prabu mara mireng atur I Sampine keto, lantas ida ngandikaang ngalih I Raden Galuh nanging apang mawastra sarwa uek, apanga I Sampi tuara nyak, minakadinne apang kadena anak lenan. Wiadin mawastra uek, masih kena baana ngingetin teken I Sampi, lantas ia nyagjag sahasa nyalulung I Raden Galuh kapalaibang ka tengah alase wayah. Sedih kone I Galuh mangilngilang, kangen tekan raga lacur, bakal tadaha teken I Sampi Wadak.
Gelising satua suba kone teked di alase ada kone punyan baingin ditu lantas ida linggihanga, I Sampi nongkrong medem di
235
