2.9. I KEDIS CENGKILENG
2.9.1. Teks
I Kedis Cengkileng
Ada tutur-tuturan satua, Ida Sang Prabu Koripan madue kone oka adiri, Ida Sang Prabu Daha sing kone ida madue oka.
Critaang Ida Sang Prabu Daha mabebaosan sareng Ida Prameswari. Ngandika Ida Sang Prabu,
"Adi, Adik. Ne pelan amone suba makelon Beline makurenan teken Adi, masih tonden ngelah pianak. Jalan ja miasa ka gunung, mapinunas teken Ida Betara apang Adi dadi ngelah pianak". Masaut Ida Prameswari,
"Margi Beli, tiang sairing".
Nah kacrita miasa kone suba Ida Sang Prabu kalih Prameswari di gunung. Ban kapagehan yasanidane, dadi turun Ida Betara Guru maranin ida. Ngandika Ida Betara,
"Ih Nanak, apa tunasang dadi Nanak ngacep nira?" Matur Ida Prameswari,
"lnggih Paduka Betara, mawinan titiang ngastiti Paduka Betara, tan wenten seos sane tunas titiang mangda titiang sida madue pianak".
"Tuah amonto pinunas nanake?"
"lnggih Paduka Betara".
"Nah nira lugra. Nah kema suba Nanak mantuk! Nanging keto, apa ja tepukin Nanak di jalan da pesan men kataraanga". Keto pangandikan Ida Betara lantas ida ilang. Jani ngandika Ida Sang Prabu teken arinidane,
"Nah Adi, jani jalan suba mulih. Ingetang men pangandikan Betarane i tunian. Nyanan apa ja tepuk di jalan, da pesan ngetaraang!"
"Inggih Beli". Jani mamargi lantas Ida Sang Prabu kalih Prameswari ngamantukang. Di margi manggihin lantas ida kedis cengkileng masiksikan di carang punyan kayune. Dening tumben pesan Ida Prameswari manggihin kedis cengkileng, matur lantas ida teken rakanidane,
"Be, kedis napi nika Beli? Aeng ja makenyah bulunne." Mara keto pangandikanida, manteg pupu lantas Ida Sang Prabu.
163
