Gading masih nu ngeling, tuara ngiring nglanturang satuane. Mara keto undukne Luh Gading, dadi ida meling teken ajinne di sameton maorta madue oka payuk tur sampun kakutang. Sawireh keto, lantas kapangandikaang ngalih I Tiwas luh muani.Satekede I Tiwas makadadua di puri, lantas ia kandikain, katugesang pesan baan Raden Mantri, undukne ia ngelah pianak Ni Luh Gading. Buina yan ia tusing nyak nuturang amun-amunne, lakar matianga. Wireh takut I Tiwas mati, lantas aturanga sakadi-kadinne uli pangawit kayang panyuud. Mara pegat satuan I Tiwase keto, lantas Luh Gading saupa baan Raden Mantri tur pepasihina.
"Beh, dong kalingane Adi mula misan Beli saling kodagang, dadi Adi nyilibang raga. Nah jani jalan Adi ka purian tangkil teken I Aji ! " sang kalih lantas mamargi madandan tangan. Ida Raden Galuh tan mari nangis. Anake ngae jaja makejang pada ngiringang.
Gelising satua unduke buka keto suba katur teken Anake Agung di Daha, ledang pesan pakayunan Ida Sang Prabu, mirengang orta, okane suba di Koripan kaduduk, lantas ida lunga ka Koripan tur ngaksama teken okanidane, baane ida ngutang anake malu.
Suening asue, dening Ida Raden Mantri Koripan suba anom, Ida Raden Galuh suba masih tutug duur, lantas kabuncingang. Abulan pitung dina rame-ramene di Koripan. Lemah peteng tuara mareren. Sasuban okane suud mabuncing, mara budal Ida Sang Prabu Daha, dening pakayunanne suba pada ledang.
