" Yeh apa ya krananne kayune tenenan kebus murub, indaang ja la kar tatasin betenne apa ya ada". Keto keneh i goake, lantas ia makeber nganuunang, ajinanga Sang Prabu muah prameswarinidane miyasa mamati raga.
"Beh, nene ngawanang suargane kebus. Ida Sang Prabu Daha sih ne. O, ne rabinidane pada sareng". Keto keneh i goake sambilanga nglingling ragan Ida Sang Prabu makakalih. Suud keto lantas makeber Sang Gagakpetak melipetan ka suargan, ngaturang unduke ento teken Ida Betara Siwa. Ditu lantas Betara ngandikain, Sang Kalimandu, kandikaang ngoda yasan Sang Prabune. Mara teked Sang Kalimandu di pakertian idane, lantas ceburanga ibanne uli punyan baingine, ulung di pangkonan Ida Anake Agung. Nanging ida masih langgeng pesan teken yasa. Tusing ja makejehan nyang agigis . Lantas aliha Ida Anak Agung Istri, palisahina raganidane ban Sang Kalimandu. Nanging masih tuara melutang apa. Dening suba nganti kenyel Sang kalimandu ngoda ida sang makerti, buina suba sanja, lantas malipetan buin ia ka suargan. Katurang teken Ida Betara buatne ia tuara mrasidaang ngoda. Ditu buin Sang Lelipi Lemputu kandikaang tuun ngoda. Nanging masih patuh buka unduk Sang Kalimandune tuara melutang apa. Dadi Ida Betara nglunganin . Ida nyuti rupa dadi pranda putus. Sarauh idane ditu lantas ida malinggih d i pucak baingine sarwi nguncarang Weda. Buin akejepne lantas ujan bunga muah sarwa miik-miik. Duaning keto lantas Ida Anake Agung ngalesuang kerti, sarwi ida muspa tur matur ring Ida Betara,
"Inggih Ratu Betara, titiang ngaturang sembah ring Palungguh Betara, kenak Cokor I Dewa ngiangin titiang, dening wenten sane lungsuran titiang ring Palungguh Betara." Nandika Betarane,
"Maan apa buin kuangan, suba amonto kasukan Sang Prabune, jani apa buin katagih?" Matur Sang Prabu,
"Wiakti katah pisan sampun suecan Cokor I Dewa ring titiang, sakewanten sane asiki manik majalan Cokor I Dewa durung ngicen titiang. Inggih yen wantah Palungguh Betara ledang punika lungsur titiang!" "Bah saja ento nu engsapin nira maicaang. Nah jani nira asung, kewala Sang Prabu apang pageh yadin rabine pada. Nyanan apa ja tepuk di jalan, da pesan papak sambata. Ne lekesan daar pada mabesik, kewala da kecuanga peesne, led abete ento makejang!" Suud Ida Betara ngandika keto, lantas Ida musna.
99
