[᭓᭙ 39B]
᭓᭙
ᬢ᭄ᬬᬂᬗᬶᬭᬶᬂ᭞ᬦᬄᬲᬸᬩᬵᬓᬸᬤᬫ᭄ᬦᭂᬗᬂ᭟ᬮᬫᬸᬦ᭄ᬜᬳᬶᬢᬸᬳᬸᬢᬺᬱ᭄ᬡᬵ᭞ᬫᬭᬭᬵᬫᬕᬸᬭᬸᬫᬗ᭄ᬓᬶᬦ᭄᭞ᬧᬸᬢᬸᬲᬂᬓᬬᬸᬦᬾᬋᬓᭀ᭞ᬕᬸᬭᬸᬩᬲ᭄ᬓᬮᬶᬯᬢ᭄ᬳᬶᬩᬸᬓ᭄᭞ᬬᬾᬦ᭄ᬢᬦ᭄ᬜᬳᬶᬚᬦᬶᬲᬸᬓᬵ᭞ᬳᬲᬸᬂᬳᬸᬭᬶᬧ᭄᭞ᬓᬾᬤᭂᬧ᭄ᬜᬳᬶᬳᬸᬭᬶᬧ᭄ᬩᬧᬵ᭟ᬕᬸᬭᬸᬦᬸᬦ
ᬲ᭄ᬳᬶᬘᬵᬜᭂᬫ᭄ᬩᬃ᭞ᬳᬧᬦ᭄ᬜᬳᬶᬦᬾᬓᬯᬶᬥᬶ᭞ᬳᬦᬓ᭄ᬮᬾᬦᬦ᭄ᬢ᭄ᬯᬭᬓᬵᬗ᭄ᬕᭀ᭞ᬫᬜᭂᬫ᭄ᬩᬃᬤᬦᬾᬳᬶᬩᬕᬸᬲ᭄᭞ᬲ᭄ᬯᬾᬲᬵᬫ᭄ᬧᬸᬦ᭄ᬳᬦ᭄ᬢᭀᬲ᭄ᬩᬧᬵ᭞ᬭᬤᬾᬦ᭄ᬤᬾᬯᬶ᭞ᬮᬶᬦ᭄ᬢᬂᬲ᭄ᬓᭂᬮᬾᬭᬶᬂᬫᬦᬄ᭟ᬲ᭄ᬩᭂᬗᬾᬓᬮᬶᬦ᭄ᬢᬂᬲᬸᬓᬵ᭞ᬢᬸᬳᬸᬬᬢ᭄ᬯᬄᬧᬸᬢ᭄ᬭᬶᬭᬶᬭᬶᬄ᭞᭠
ᬩᭀᬬᬓᬾᬬᬾᬦ᭄ᬢᬶᬢ᭄ᬬᬂᬳ᭄ᬮᭀᬂ᭞ᬫᬭᬭᬵᬫᬭᬶᬂᬳᬶᬕᬸᬭᬸ᭞ᬬ᭄ᬯᬤᬶᬦ᭄ᬢᬶᬢ᭄ᬬᬂᬧᬘᬂᬜᭂᬫ᭄ᬩᬃ᭞ᬦᬤ᭄ᬬᬦ᭄ᬫᬗ᭄ᬓᬶᬦ᭄᭞᭠ᬳᬶᬗ᭄ᬕᬶᬄᬲᬦ᭄ᬤᬶᬓᬦ᭄ᬲᬂᬦᬵᬣ᭟ᬬᬾᬦ᭄ᬳᬶᬕᬸᬭᬸᬮᬶᬦ᭄ᬢᬂᬳᬶᬘᬵ᭞ᬫᬧᬸᬢ᭄ᬭᬭᬶᬂᬢᬶᬢ᭄ᬬᬂᬫᬗ᭄ᬓᬶᬦ᭄᭞ᬢᬶᬢ᭄ᬬᬂᬢᬾᬫᬵᬢᬹᬃᬫᬢᬓᭀ
ᬦ᭄᭞ᬳᬶᬕᬸᬭᬸᬓᬢᬶᬩᬾᬦ᭄ᬢᬫ᭄ᬬᬸ᭞ᬓᬢ᭄ᬓᬦ᭄ᬤᬭᬶᬓᬶᬲᬸᬗ᭄ᬓᬦ᭄᭞ᬬᬾᬦ᭄ᬢ᭄ᬯᬄᬯᭀᬂᬮ᭄ᬯᬶᬄ᭞ᬰᬸᬤ᭄ᬭᬳᬧᬂᬢᬶᬢ᭄ᬬᬂᬦᬯᬂ᭟ᬲᬵᬫ᭄ᬧᬸᬦ᭄ᬓᬾᬕᬸᬭᬸᬦᬢᬲᬂ᭞ᬭᬶᬂᬢᬫ᭄ᬬᬸᬦᬾᬲᬸᬗ᭄ᬓᬦ᭄ᬫᬗ᭄ᬓᬶᬦ᭄᭞ᬚᬤ᭄ᬫᬵᬲᬓᬶᬂᬦᬧᬶᬋᬓᭀ᭞ᬤᬾᬦᬶᬂᬢᬶᬢ᭄ᬬᬂᬩᬚᬂ
[᭔᭐ 40A]
᭔᭐
ᬳ᭄ᬮᬸᬄ᭞ᬓ᭄ᬦᬶᬢᬶᬢ᭄ᬬᬂᬧᬸᬭᬸᬦ᭄ᬜᭂᬫ᭄ᬩᬃ᭞ᬫᬗᬬᬳᬶᬦ᭄᭞ᬬᬾᬦ᭄ᬲᬸᬤ᭄ᬭᬓᬮᬯᬵᬦ᭄ᬫᬾᬦᬓ᭄᭟ᬕᬸᬭᬸᬦᬾᬦᭀᬭᬗᬦ᭄ᬤᬶᬓᬵ᭞ᬫᬗ᭄ᬭᬯᭀᬲᬂᬭᬕᬵᬧ᭄ᬮᬶᬄ᭞ᬤᬾᬦᬶᬂᬧᬸᬢ᭄ᬭᬦᬾᬫᬢᬓᭀᬦ᭄᭞ᬳᬶᬩᬕᬸᬲ᭄ᬢ᭄ᬯᬭᬜᬓ᭄ᬗᬓᬸ᭞ᬓᬾᬦ᭄ᬓᬾᬦ᭄ᬚ
ᬦᬶᬩᬦ᭄ᬗᭀᬭᬳᬂ᭞ᬧᬭᬚᬦᬶ᭞ᬳᬶᬗᬸᬄᬤᬸᬓᬵᬢ᭄ᬓᬾᬦ᭄ᬭᬕᬵ᭟ᬳᭀᬓᬦᬾᬫᬳᬢᬸᬃᬲᭂᬫ᭄ᬩᬄ᭞ᬢᬶᬢ᭄ᬬᬂᬦᬸᬦᬲ᭄ᬮᬸᬕ᭄ᬭᬵᬫᬗ᭄ᬓᬶᬦ᭄᭞ᬢᬶᬢ᭄ᬬᬂᬦᬾᬫᬗ᭄ᬓᬶᬦ᭄ᬫᬢᬓᭀᬦ᭄᭞ᬲᬂᬦᬵᬣᬳᬰ᭄ᬫᬸᬓ᭄ᬜᬸᬂ᭞ᬳ᭄ᬦᬄᬓᬾᬜᬳᬶᬦᬓᭀᬦᬂ᭞ᬲᬶᬜᬜᬳᬶ᭞
ᬓᬬᬸᬦ᭄ᬳᬶᬩᬕᬸᬲ᭄ᬗᭀᬭᬳᬂ᭟ᬤᬾᬦᬶᬂᬕᬸᬭᬸᬢ᭄ᬯᬭᬦᬯᬂ᭞ᬰ᭄ᬭᬷᬧ᭄ᬭᬫᬶᬰ᭄ᬯᬭᬷᬜᬳᬸᬭᬶᬦ᭄᭞ᬫᬶᬭᬄᬫᬾᬫᬾᬦᬾ᭠ᬫᬵᬲᬶᬗᭀᬂ᭞ᬲᬵᬫ᭄ᬧᬸᬦ᭄ᬳᬶᬫᬶᬭᬄᬕᬸᬂᬩᭂᬦ᭄ᬤᬸ᭞ᬢ᭄ᬓᬾᬦᬶᬂᬕᬸᬭᬸᬦ᭄ᬳᬶᬤᬾᬯ᭄ᬯ᭞ᬩᬮᬶᬓ᭄ᬜᬳᬶ᭞ᬦᬓᭀᬦᬶᬦ᭄ᬫᬾᬫᬾᬮᬸᬕ᭄ᬭᬳ᭟
ᬦᬯᬂᬢᬺᬗ᭄ᬖᬡᬳᬜᬸᬫ᭄ᬩᬄ᭞ᬲᬦ᭄ᬤᬶᬓᬦ᭄ᬰ᭄ᬭᬶᬧ᭄ᬭᬫᬶᬰ᭄ᬯᬭᬷ᭞ᬲᬵᬫ᭄ᬧᬸᬦ᭄ᬫᬾᬫᬾᬲᬮᬶᬢ᭄ᬋᬓᭀ᭞ᬭᬤᬾᬦ᭄ᬕᬮᬸᬄᬫᬸᬯᬸᬄᬲᭂᬦ᭄ᬤᬸ᭞ᬲ᭄ᬩᭂᬗᬾᬫᬲᬶᬄᬢ᭄ᬯᬄᬩᬶᬗᬃ᭞ᬢᬹᬃᬫᬗ᭄ᬭᬭᬶᬲ᭄᭞ᬫ᭄ᬦᬾᬓᬦ᭄ᬫᬫᬓ᭄ᬢᬲᭂᬫ᭄ᬩᬃ᭟ᬭᬳᬤᬾᬦ᭄ᬕᬮᬸᬄᬫᬜᬧ᭞ᬧᬸᬦ᭠
