Kaca puniki kavalidasi
PONGAH JUARI
Mirib tanpa rasa
Kipak-kipek ngeka daya
Seledete ngincang
Peliate merengang.
Limane patigrape
Kenehe ngape-ape
Asing gelah anak gampilang
idepne tan kapialang.
Sebenge enteg
Mapi-mapi sadu
Yan suba makeleteg
Pasti malaksana dudu.
(Denpasar, 13-7-2002)
NAH DEPANG SUBA
Gumi cara janine
Makejang ida danene
Masuluh di banyune
Lawat tan adung ring semune.
Makejang galak prewira
Yan suba mrebutang
Mapi ririh tan kapialang
Sujatine makejang nista bara.
Makejang kecacadin
Tusing ada beneh tur patut
Pamuput yan selehin
Ipun dot mangda katut.
Cihnaning kali yuga
Beneh pelihe sarora
Tegeh endepe tanpa cihna
Nah depang suba.
25
