PAMAHBAH
Buku utawi.cakepan puniki kawastanin Makudang-kudang Drama Bali. Dagingipun carita sane mawangun drama kehnyane wantah adasa siki. Carita drama sane mungguh sajeroning cakepan puniki kapah dados kalih soroh,inggih punika pahan sane kapertama carita drama soroh Drama Gong miwah pahan sane kaping kalih carita drama soroh Drama Bali Anyar.
Mungguing carita Drama Gong sane karanjingang katahipun wantah limang carita. Papupulan carita Drama Gong puniki sami awi-awian dane Ketut Putru saking Desa Banyuning, Kabupaten Buleleng. Ngeninin kawit kawentenan carita Drama Gonge sane kaunggahang sakadi mangkin iriki wantah sangkaning pinunas titiang ring dane Ketut Putru mangda ngawi carita Drama Gong mangda prasida kalumrahang ring jagat Bali.
Ngeninin papupulan carita Drama Bali Anyar katahipun naler wantah limang carita. Drama Bali Anyar sane mungguh iriki kakawi olih Nyoman Manda mamurda "Masan Cengkehe Nedeng Mabunga" lan "Kuuk", olih I Nyoman Nada Sariadha mamurda "Sari", olih Nengah Segatri mamurda "Semun Langite Kantun Sendu", lan olih I Gusti Putu Sukardi mamurda "Keris Pustaka".
Wit Drama Bali Anyar puniki wantah majalaran saking kaledangan Bapak Dangin Harnama saking Listibya Propinsi Bali ngawehin titiang nganggen dokumentasi ring Balai Penelitian Bahasa. Makuweh malih wenten Drama Bali Anyar sane tiosan sane nenten ranjingang titiang sajeroning cakepan puniki mungguing dagingnyane durung anut saha lengut.
Kawentenan medal cakepan sakadi mangkin puniki boya ja tios wantah sangkaning pamitulung sane rauh saking semeton titiang, makadi: Drs.Pasek Parwatha, Drs. Wayan Sudana, Drs.Ida Bagus Rai Putra, rauhing taler sane muputang ngetik semeton Suastiana.
v
