Makudang-kudang Drama Bali
"Masan Cengkéhé Nedeng Mabunga"
Olih Nyoman Manda
Undagan I
(Semengan galang kangin..., angin gunung mesir, sayongé ngrawang- ngrawang, kedisé cruat-cruét. Kacrita semengan punika ring pondok gedé Pan Nérti di Désa Nyebah, Kayuamba, Bangli, Pan Nérti mara bangun makalong saput gremong, negak di plangkané cenik makebat tikeh uék. Ditu ada caratan cenik pabuan wadah basé. Di bucun pondoké ada kranjang padang magantung. Di samping sakané ada sangian tekén paso cenik wadah yéh. Damar témplék magantung di dinding gedégé. Suara kroncongan sampi, kasarengin antuk suaran kedis cruat-cruét).
Pan Nérti : (Mara bangun uab-uab, laut negak nyadédér si sakané di samping jlanané) “béh......nyak masi ngrembiak bungan cengkéhé. Ah..., dadi makelo
ujané tuun, apang énggal maan daatan (Ngrimik padidiana).
"Ah... Enu masi dinginé." (Menahin saput gremongné)
"Ah...." (Buin uab-uab)
"Dija janga arité". (Bangun matungked bangkiang sada jangkeh kipak-kipek ngalihin arit)
"Méméné... méméné... bangun" (Tusing ada nyautin)
"Méméné... méméné... gangsarin bangun..... jeg medem duén....
Sampiné suba numbrag-numrag di badané. Méméné bangun! Dija janga arit icangé? Ené panaké dija semengan pesan, suba ilang.
"Méméné... Méméné... bangun!" (Laut nyongkok diarepan pondoké).
Mén Nérti : (Kepupungan mara bangun kilang-kileng di obag-obagan koriné enu makrudung saput gremong) "Eh... dadi uyut Beli semengan, apané kauyutang, jeg uyut sabilang semengan, sing tawang Beli, matan icangé enu kiap".
Pan Nérti : (Sada bangras) "yén kenéké tegeh matan ainé,
