"Becik tiang mataki-taki dumun,” atur Pan Laksmi. Kasambung malih : ” Benjang tiang pacang ka Badung.”
” Napi karereh Pak?”
” Niki sampun tanggal satu. Tiang nengokin pianak tiange. Meweh madue pianak masekolah mangkin. ”
” Ring dija masekolah?” Pan Laksmi masaur :
" Sekolah Bidan .... Rumah ... Sanglah .. . . Pusat Umum.” Mireng kurenan ipun salah ucap raris Men Laksmi matur.
” Ampura pak dokter, kurenan tiange ngacuh.” Kasambung malih :
” Ngaur dogen beli Wayan. Ngorahang Rumah Sakit Umum Pusat Sanglah dogen tuara krambang. Kene suba kliwat ageng manahe.”
" Oh, keto? Rumah Sakit Umum Pusat Sanglah. ” Asapunika Pan Laksmi nutur newek sakadi wau mlajah memazca, sambilang ipun kenyem-kenyem congah.
Sampun jam kutus lintang limolas menit. Rauh suster Maria. Panganggene sami putih. Saluiring pangering sang sungkan Kauningang ring dokter Gunawan. Pamuput Dokter Gunawan mapitaken saantukan pianak Pan Laksmi lali kabaosang.
” Bagaimana Suster, adakah you melihat perubahan pada pasien tadi?”
” Bertambah baik, Dokter,” atur suster Maria. Pan Laksmi acereng nlektek parisolah suster Maria. Eling ring tatwa, raose banban, ngawe seneng sang mireng. Wantah munggah tedun pliat Pan Laksmi. Men Laksmi wantah ngedesem.
” Melahang ngaba paningalan, beli Wayan.”
Miragi punika barak biying ipun Pan Laksmi. Gelis Pan Laksmi ngraos sakadi anake ngicalang kabilbil.
”Inget beli teken I Putu. Patuh. Cara anak kembar tingalin beli suster Maria ngajak I putu
” Apane patuh? ”
” Kenyir. Tindakan. Sledet. Enggokan.”
Dokter Gunawan ica. Suster tan ngarti basa Bali wantah makenyem. Sakadi saking pituduh Sang Hyang Widhi mapitaken
