- 6 -
” Selamat malam beli bagus! ”
” Apa kabar Luh?”
” Patuh buka ibi sanja beli, ”
” Sing ada perubahan? ”
” Aduuh! Melid gati, Suba orahang patuh. ”
” Gaya gati mulane Luh, Apa buin mapayas adat cara jani. Jegeg cara dedarine uli suarga.”
” Suud malu ngulgul tiang beli Gede! Ngoyong malo dini nah! Tiang jegi ngaturang canang. ”
” Rerainan apa jani Luh?”
” Sing ja ada rainan beli. Mula tiang sebilang peteng setata ngaturang canang nunas kaselametan ring Ida Betara. ”
Luh Manik pesu nampa bokoran bek madaging canang. Gede Parta nyantos ring warung sareng anake sane tiosan sane patuh tatujon ipun inggih punika nganggur. Nenten lepas-lepas matan ipune ring Luh Manik, Tindakan muah tayongane lemuh magelohan nganyudang manah. Pakrimik ipun pedidian.
” Aduh Dewa Ratu. Yan amone jegeg anake luh, teked ka suarga adu tusing bakal keciwa Ratu Betara! Dumadak ja i pun nyak makurenan teken titiang. ”
Sedek ipun nerimik asapunika, manahnyane nrawang doh pisan. Tengkejut ipun miragi suarannyane Luh Manik.
” Apa orahang beli pedidian cara anak buduh? Nginik- mik cara munyin tibangbung dingeh tiang? ”
” Sing Luh. Beli angen pesan teken goban Luhe Kalah Ratu Sirikit uli Siam ”
” Da ja beli bes sanget ngajum anake buka tiang. Da bes tegeh nunjuk tiang, dilabuhe apang tusing babak belur! ”
” Beli ngorahang amen benehne Luh, Saja beli buduh paling teken Luh. ”
” Bedikang ngajum, bedikang ! Sing ada pis cenik!
Wengine sampun ngwayahang. Warung ipune sampun sepi. Kantun ipun kewanten sareng kalih, Negak mapaekan. Gede Parta ngancan galak sesolahan ipune, ngancan gudip liman ipune. Sambil ngusap-usapang boknyane ipun fgomong sada bamban.
