Kembang Rampé
meli baas aji séket, to siapé nu aukud to tampah!" Kurenanné ngénggalang meli baas, tur ngejuk siap lakar tampaha.
Jani kaceritaang suba peteng tur nasiné suba lebeng, lantas ané luh masagi. Anaké odah lantas katurin sagi, lantas anaké odah ngomong, "eh, mai té cening, bareng-bareng dini madaar, apanga liangan keneh pekaké agigis!" I Bagus Diarsa lan kurenanné, lantas ditu bareng-bareng madaar.
Sasubané suud madaar, lantas né luh répot nampedang dulang tekén piringné. I Bagus Diarsa nu ditu ngenemin anak odahé ento. Anaké odah ngomong "cening, kénkén I tuni matajén?"
I Bagus Diarsa ngomong, "tiang kaon telung atus".
Anaké odah ento buin ngomong, "cening sai-sai katajén?" Sering pekak, nanging pepesan kalah. "Jani apang tiang tusing kapiutangan, siap pekak ja juang cening!"
I Bagus Diarsa lantas masaut, "inggih bénjang naenin ja tiang lakar mlali mrika, nunas ayam napi asiki". Anaké odah tekén I Bagus Diarsa makelo mapaomongan, kanti kenyel ané luh ngantosang. Makelo-kelo anaké odah buin ngomong, "cening, cening ngelah pianak?"
I Bagus Diarsa buin ngomong, "inggih wénten wantah adiri, nanging kantun alit".
Anaké odah ngomong, "béh, apa pekak jumah padidian pesan, buina pekak suba tua, baang ja pekak ngajak ka kubu, apang ada tundén-tundén pekak."
I Bagus Diarsa bun ngomong, "inggih ajak ja, yén ipun sampun nyak, tiang tan ja nombaang". Sambilanga ngomong kéto lantas panakné jeritina, "cening".
"Tiang?" Masaut pianakné.
"Mai ja malu!" Tusing makelo teka pianakné. I Bagus Diarsa lantas ngomong, "cening, cening idihé tekén anaké odah, lakar ajaka ka kubu, kénkén cening nyak?"
Pianakné lantas masaut, "inggih yén sampun saking Bapa, tiang tusing ja bani tulak".
