Kesusastran Bali Purwa
"Ditu sig umah dadong Rangsasané". Nglantas koné I Bawang nuturang paundukanné matigtig, muah dugasé ia nagih ampakang jlanan, ada nagih nomplok aji pabungbungan, aji blida, ada nagih nagel aji saang kandikan.
Kangen koné dadongné madingehan tutur I Bawangé kéto. Mara empuga waluhé, teka misi mas-masan tur masesocan pakranyah, luiré: blengker, bebadong, gelang, miwah makudang-kudang bungkung. Kendel koné I Bawang, rasa buka otonin koné kenehné, baané acepokan ia ngelah panganggo amonto liunné.
Gelising satua suba semengan, kacerita jani Mén Bawang lakar nyakan. Dening tusing ada api, tundena pianakné I Kesuna ngidih api sig dadongné. Mara neked ditu, dapetanga I Bawang negak di ampiké nganggo sarwa mas-masan. Ngon koné I Kesuna lantas matakon, "mbok, mbok, dija mbok maan panganggo mas-masan?"
11. Crukcuk Kuning
Ada tuturan satua anak makurenan ngelah panak koné dadua, madan I Bawang tekén I Kesuna. I Kesuna kelihan, I Bawang cerikan. I Bawang ceritané sayanganga pesan tekén mémé bapanné. Asing tagiha I Bawang, kuala sida baan tekén mémé bapanné, baanga dogén. Sapamunyin I Bawangé misunaang embokné teka jeg guguna dogén. Sanget pesan mémé bapanné mabaat-baatan, mara-maraan mabaan pepesan misi temah. Japi kéto I Kesuna nu dogén koné nyulsulang déwék tekén mémé bapanné, diapin tekén adinné, nu dogén ia makeneh naros, baan inget ia manyama padaduanan buka sepita.
Nah cerita sedek dina anu, semengan makikén méméné luas ka peken, kaukina lantas pianakné, makadadua lakar tundéna nebuk.
"Cening-cening, Bawang, Kesuna, mémé lakar ka peken, nyanan tuunang mén padiné, tebuk nyen ajak dadua,
