Kesusastran Bali Purwa
wénten pican Widiné, titiang prasida nambanin dané-dané ring jaba."
"Nah tegarang cening!" Suba kéto mulihan lantas I Wirajaya morahan tekén dedari Spraba.
Gelising satua, seger lantas para patihé, punggawané, muah lén-léenan. Jani makiré pamarginé lakar mantuk ka Negara. Panjaké sami girang. Di makiken I Wirajayané ninggal désa Tegalanyar, ngomong koné dedari Supraba
tekén I Wirajaya, "cai Wirajaya, déning jani cai suba nepukin melah, nah to banjun emboké ané engkebang cai idih embok jani, apang embok nyidaang mulih ka suargan!"
"Inggih, titiang tusing bani tulak tekén pangidih emboké. Ambil bajun emboké, di taman betén pasiraman emboké engkebang tiang."
"Nah lamun suba cai lega, embok lakar ngalih kema".
Tan kacerita dedari Supraba, kacerita panjaké suba ngamong-ngamongin gegawan, lantas agrehan mamargi. Ida Anaké Ayu majoli sareng I Wirajaya. Kacerita suba rauh di puri. Ri tatkala padéwasané becik, I Wirajaya kabuncingan ajaka okan Anaké Agung tur kaadegang agung.
25. I Bintang Lara
Kacerita ada anak makurenan madan Mén Bekung sareng Pan Bekung. Sedek dina anu lantas luas Mén Bekung ajaka kurenanné kaalasé ngalih saang. Di jalan bedak pesan koné Mén Bekung, ditu lantas ia ngalih-alihin yéh, népukin lantas tengkulak misi yéh turmaning yéhé ento lantas inéma. Di subané suud nginém yéhé ento dadi prejanian lantas beling Mén Bekung. Béh tengkejut pesan kénéhné Mén Bekung lantas morahan tekén kurenanné, "Pan Bekung, Pan Bekung, nguda ya icang jeg beling mara suud nginem yéhé di tengkulake?"
Masaut lantas Pan Bekung, "béh yén kéto, pedas yéhé ento ngranaang beling." Kéto pasautné Pan Bekung tur lantas
