Kesusastran Bali Purwa
Ni Balu Kawanan.
"Yé, pidan mati panak beliné? Mara ibi not icang seger oger panak beliné I Lengar.
Masaut Pan Lengar, "mara gati, anak kanyudang tendasné di tukadé. Kabelog-belog kajak mancing. Ya mara ia nyongkok mulang pancing katinjak tendasné uli duri. Apa nglémbang poloné benng kelod. Bangka suba poloné antep- antepanga tekén yéhé di batuné".
Masaut lantas Ni Balu Kawanan, "né kéné né beli, pianak beliné tera pedalem beli ngamatiang, kalingké tiang anggon beli kurenan, yan icang makurenan ajak beli payu dadi pantig-pantigan dogén nyen icang ditu, icang tera bani. Nah da suba lantanganga ténénan, icang tusing demen tekén beli. Kema suba beli mulih, buina icang tusing maan masanggupan tekén beli!" Kéto abet Ni Balu Kawanan, apa kabil-bil lantas Pan Lengar, laut pesuan, aéng pliatanné.
Tan kacerita Pan Lengar ajak Ni Balu Kawanan, kacerita jani I Lengar, tusing koné mati, kampih lantas ia di pasisi, ngrayang koné ketuhé lakuné, ditu lantas pedemanga ibanné. Suba jenénga melahan kenehné, negak lantas ia sambilanga makeneh-keneh-kénéh, "né kija laku jani, mati ja mati, idup
ja idup?" Suba pasti kenehné kéto, lantas ia bangun tur lantas majalan. suba pajalan I Lengaré, sabilang nepukin kubu koné singgahina dogén ngidih-ngidih nasi. Ada ja koné maang nasi, ada ja tusing.
Kacerita neked suba pajalanné di alasé, laut nepukin tetamanan ia ditu.
"Né ada taman dini, nyén ngelah tamané né, dini ja koné malu mrérén," kéto kenehné I Lengar, negak koné lantas ia ditu di bongkol nagasariné. Buin kejepné laut ada koné dedari paceburbur kema kayéh di tamané ento. Bengong koné I Lengar mabalih dedari. Né tusing tawanga i déwék dini, teka-tekan oka ngelus kamben teka anaké luh ento. Méh né jenénga madan dedari, bakal engkebang ja bajuné
