Kembang Rampé
Matur ida Radén Galuh, "inggih Beli Mantri, buat nika tiang nénten ja nyebetang, yéning titiang sebet meh tiang nénten driki napi nongos." Suba kéto, ngaksama lantas ida Radén Mantri Koripan tekén ida Radén Mantri Madé, buat idané tandruh tan nyapa ida.
Kacerita jani di purian, ida sang Prabu ngati-ati ida Radén Mantri, dadi merang pesan koné kayun idané tekén okané. "Né kénkén sih nyetné i nanak bagus, dadi pianaké mamitra tekén pianak Mén Bekungé, laut pianakné kencanina upahanga magenep-genepan, né pianak gelahné sajaan dadi tra ringunanga?” Kéto kayun idané, lantas ida ka taman kairing baan patih ngrereh okan idané.
Sarauh idané di taman, kapanggihin okan idané kari mreraosan sareng tetiga, ngraosang buat Radén Galuh Singasariné suba mobot satondén kambil olih Radén mantri Koripan.
Ngandika ida sang Prabu, "nanak Bagus, uli semengan aji ngati-ati cening di puri, kadén buin kejepné teka, tusing, kadén buin kejepné teka, masih tusing. Dadi pianak Ni Wayan Waluhe dogén sih kencanin nanak? To pianak ceningé kadén jani odalanné?"
Matur lantas Radén Mantri Koripan, "inggih Ratu Aji, mawinan asapuniki manah titiangé, santuka anaké alit di puri nénten pakaryan titian." Lantas koné aturanga indik-indik Radén Galuh Singasariné uli dugas tondén ambil ida nganti suud mabuncing, manut atur ida Radén Galuh Daha. Mara kéto ilang lantas bendun ida sang Prabu tekén okané, lantas ida ngaksama tekén ida Radén Galuh Daha kalih Ida Radén Mantri Madé, buat idané tuara uning tekén unduké buka kéto.
Suba jené kéto, ida sang Prabu makayun buin mabuncingan okan idané sareng Radén Galuh Daha, tur okan idané makekalih sairing, lantas ida ngutus i patih mendakin ida pramésuari ka puri lan apang i patih ngaturang pidabdab
118
