Kembang Rampé
manyingid buin magoba asibak, madingehang raos, lantas ia matur tekén sang sané mangaraos ditu, “inggih yan yakti asapunika wacanan ida sang Prabu, titiang nunas ngiring pakayun idané sané mangkin, kéwanten mangda ida dané sareng sami nonton satingkah titiangé ngiring pakayunan, yadin pacang sadia tan sadia, mangda kapanggih. Sapunika
atur titiangé.”
Gelising satua enggal ada nguningang ring ida sang Prabu, ada jadma samakuta jagi nelasang satrun idané, nanging jadma tamiu, merupa tuah asibak. Pangandikan ida sang Prabu, kapangandikain netesang, jadma uli dija teka magoba asibak, anak kénkén? Katetes koné ia baan parekan sang Prabuné. I Truna Bagus ngorahang awakné uli di alasé, sing ja nawang awakné, apa buin umahné. Kauningang kéto masih tekén ida sang Prabu, engsek ida makayunin, apan jlema asibak, sing buungan ia kaicén putran idané tur serahin ida guminé. Cendek engsek pakayunan ida sang Prabu, nanging kadong suba sauh pangandika, “nah depang dogén, kalingké jlema mala sing genep jlema ukudan ririh suba kéweh, apan raksasané gédé bin sakti, teguh rebut ajak liu sing mintulin.” Buin ngandika ida sang Prabu, “ih iba patih pada makejang, nah kema dauhin panjaké makejang apang pesu mabalih, né ada anak tuah asibak bani nglawan musuhé, bakal ngamatiang musuhé ento!” Nah suba jani kéto, enggal pada madedauhan, ngatag panjak ida sang Prabu, pada pesu ka bancingah mabalih tur suryak-suryak makuug ngelurin raksasané apang énggal teka.
Kacerita i raksasa nu joh suba ningeh munyin jlema suryak-suryak makuug, ia kendel laut ngénggalang melaib nyagjagin, keneh-kenehné, “jani ingong betek ngamah manusa suba mapunduh liu, sada noos angkihané. Ngeb maketketan pada anaké ningeh geluran raksasané totonan, apan sing buungan bakal amaha. Ditu I Truna Sibak nyinahang kawanénan tekén kasaktian panugrahan Widiné,
132
