Nyoman Sayang : "Men cucu-cucun Nanange ane lenan.... cara I Putu ... I Kadek .... I Komang .... lakar kenkenang."
Nang Gabor : "Beh saja, adi engsap bapa teken cucu-cucune lenan. Akuda ja bapa ngelah cucu. Sing lebih sing kuang, duang dasa suba ada. Cucu ngarep dogen ulihan panake muani patpat, suba nem belas. Ulihan pianake luh, ada patpat lumayan batinne. Pantes gumine enggal bek bes mabalapan manusane ajak bikule nglekadang panak." (anake cerik ngeling. Nang Gabor tengkejut)
Nyoman Sayang : "Sstttssttt ........ " Nang Gabor : "Jangih pesan ling anake cerik ..... Uli jani suba ada tanda-tanda melah. Lingne ngisengin pesan."
Nyoman Sayang : "Suba jam sepuluh tenenan. Sukra jani."
Nang Gabor : "Ada apa Sukra?"
Nyoman Sayang :"Bin kejep dogen beli Gede teka uli kantor. Icang majanji ngaenang bregedel ajak sup tahu. Ibi sanja icang baang pipis seribu rupiah. Maan hadiah uli kepala kantore, tundena ngetikang akta perusahan timpalne."
Nang Gabor : "Ento koropsi adanne (nelik paningalanne)."
Nyoman Sayang : "Hadiah Nang.... sing ja koropsi."
Nang Gabor : "Yan makejang kepala kantore buka kepala kantor kurnan nyaine, bangkrut negarane. Korupsi kertas.... karbon... waktu...."
Nyoman Sayang : "Beli Gede dija ya bareng korupsi."
Nang Gabor : "Dija keto? Huuh yan cara raos Indonesiane...... bareng terlibat adanne. Laksana ane suba tawang lepas teken awig-awig jagat bakat barengin.... apa adanne totonan.... Karma palane cicih........"152
