Kaca puniki kavalidasi
22
- I Katak kendel dimanah, reh kena banya ngingetin, mantun nyane I Kaplegan, tandua manyagjag nampekin, ngelut baong mangeling, mamunyi ngolasang kayun, "Duh Cening pianak Bapa, buka pituduhing Widi, Bapa idup, I Cening nepukin erang.
- Nutug saja tani bagia, lacur caine ne jani, manganggon Bapa rerama, dadi kakedekan gumi, sangkaning buka jani, Bapa manepukin lacur, tuara tau ring dosa, ngatuju Bapa malali, ngalih capung, sambilang makakidungan.
- Dening nene suba-suba, majalan malali-lali, kadong anggon Bapa cihna, pang da saru teken maling, tuara ada ngalangin, yadiapin Bapa makidung, bu jani saget ada, I Lelasan buka imbih, munyi gangsul, manyambat sara mabatbat.
- Bapa mangidih kaplihan, mangdennyane buung brangti, ya tuara trima pisan, sumangkin matbat nangtangin, kalih ya maduunin, kajagur Bapa ping telu, tuara maan matingkah, dening bas liu ngijengin, bah macebug, Bapa engsap teken awak.
- Yen kalikenken tegula, tau Bapa suba dini, mangatuju cai teka, buka dadak swecan Widi, mapitulung ban urip, dening Bapa jati patut, to keto wiwilannya, apang cai tatas uning, pang subanan, cai sumesel ring Bapa."
- I Kaplegan mandingehang, mangrasa wirang di ati, lima batise mangetor, angkihane daas-diis, matane barak ngendih, mamunyi manunas ngamuk, ngulihin I Lelasan, I Katak ya ngasih-asih, mapitutur, mandabdabang kapatutan.
