Kaca puniki kavalidasi
233
Pekik. panji Surengrana Ratu. saksat raga kusuma. yanging ring kidung kakawin. karangkitang. ring jagate sinamian.
- Maraga mantra utama, manambanin buduh paling, ri kalane ring paturon Sri Kameswara malih, pareab I Ratu suang manaur, ngastawa Sanghyang Smara, ngiring kayun, Ida Sang Amawa Jagat.
- Makacudamanin titiang, Mpu Darmaja puniki, anging doh pacang nyidaang. titiang muputang pangawi. kabatek antuk pingging. ring napine Pacang patut, sotaning kawi anyar, malih wong dusun sujati, sek kadudut, ring kulangunan segara.
- Riin duk Ida Hyang Siwa, manangun yoga nusmreti, maring Mahameru reko, patapan sang sidayogi, kasayuban nyambu asri. ring anyung tukad puniku, gununge tampek pisan, makadewa desa sami, nangun tapa, yen napi malih saratang.
- Dening paragaan ida, paramatatwane lewih, kanutin sarwa agama, ongkara Siwangga luwih, nunggal reke wiyakti, unteng Brahmamantra putus, mwah aksarannya kocap, satingkahing dasamurti, kadabdabang, sangkaning suara wianjana.
- Singiding nyana wisesa, mider pangencepe mangkin, udep luih mangregepang, muceh indria ring ati, tan wenten Marawat malih, nelebang sukan patemu, sayang kajegegannyane, widiadari lewih-lewih, tan kalingu, antuk Ida Sanghyang Siwa.
- Malih reke warnanida Sri Giriputri, wau mangrajasuwala, cerita swargane mangkin, karusakan wiakti, antuk raksasa mangebug, I Nilarudraka, ratune ring Senapati, ring bongkolnya, gunung Himawan punika.
- Lambunge ada beleran, purinunyane mangewehin, sawengkoning tegal sena, jerih tan purup matanding, tag mangkin, watek Dewa sami ibuk, ngeb reke samian, suwargane karusuhin, sakatahnya, watek Dasalokapala.
- Sami kumpul matimbangan, sakatahing Sang Sidarsi, Wasista miwah narada, gandarwa apsara ngiring. Sanghyang
