Kaca puniki kavalidasi
1.40 GEGURITAN ANAK ANE BELOG
Puh Mijil
- Kocap dusun pabanjaran kangin, wenten jadma belog, kasilihin pengedangan gede, antuk ipun Memen Mudarani, jantos tigang wengi, tan budalang ipun.
- Ditu laut I Belog managih, kalih ipun ngojog, kumahne nyelang pengedangan, sane nyelang tumuli ngenjuhin, payuk sane alit, tan wenten puniku.
- Kala ditu I Belog mamunyi, "Sane riin Embok, pecak nyelang pengedangan gede, sapunapi kengin Embok mangkin, payuk lintang alit, tan wenten puniku.
- Dija payuk titiange riin," pasaurne alon, "Uduh Embok Men Mudaranine, ne payuk nyaine ane riin, manak payuk alit, panakne juang malu".
- I Bekog ngugu payuk manak alit, tumuli mabobos, budal encol ngambul pamargine, rauh sampun ring umahnya mangkin, kocap sampun lami, katagih gelahipun.
- Sane nyelang tur imasaur aris, "Pengedangane ento, suba mati dugas Wrespatine," kagiat Men Mudarani miragi, payuk bisa mati, tumuli masaut.
- "Enggih Embok sajawining mangkin, titiang lintang angob, miragiang pengedangan gede, uning padem kadi ucap Bibi, sane riin-riin, ten dadi puniku".
- Sane nyelang sumaur tumuli, "Kene munyin Embok, payuk cerik panak pangedangane, ento nguda dadi gugun nyai, nene buka jani, tusing ngugu lampus".
- Ditu laut Memen Mudarani, liatnyane bengong, bas kaliwat kimud idepnyane, laut mulih ngambul tur ngeling, mapineh di ati, beloge kerana lacur.
- "Ih Belog eda sebet di ati, saja nyai belog, tusing nawang apa ne adane, bibi jani maiigorahin nyai, pengedangan cerik, ento madan payuk".
126