"Napi nika Pak Badrun? Tumben tiang nepukin uled buka kene liunne?"
"Niki madan lulut Luh. Cirine wenten anak sungkan rahat. Biasanne kawewehin antuk simbar. Nanging sampunang nika kenehanga. Anggep dogen luun jagat." Amak Badrun nginang base lantas kecuh-kecuhanga peesne ka natahe disisin undage.
Di kamar cekceke rame ngucikcak. Amaq Rah khusuk madoa di tebenne Lale Dumilah. Gusti Ngurah masila beten ngrana sika ngamel dupa nganti numper. Duuhan rabinne sayan makelo sayan ngigisang, nganti maklepek sirep sepi. Amaq Rah bangun ningalin cokorne, Gusti Ngurah natabin angkihan di cunguhne takut yen rabinne tan katulungan, sawireh ten pesan maklisikan. Priksana kedutan di pagelanganne normal dedeh pesan.
"Syukur Gusti Ngurah, sami sampun lintang. Rabine sampun waras. Cingakin cokorne ten kari beseh tur sampun angetan maka jatimula. Banggayang sirep dumun mangda matuptup bayunne. Nanging tetep dumun malinggih deriki, elingang nyanan yen matangi sampunang icena tedun dumun mangda aasan borehe nenten ulung ka natahe. Samian rawing don pisange niki anyudang ring tukade," raosne Amaq Tirah.
"Nggih matur sukma antuk pitulung Amaqe kurenan tiange selamet," kenten Gusti ngurah padelengdeng toyan panonne saking garjita rabinne preside kenak. Amaq Tirah ngampakang kurine pesu lantas negak masila tiding. Sebengne sredah lantas ngenjit rokonne, kretek ganda cap kuda pabrikan Ampenan. Gusti Biang Suci saking kedeh kayunne simalu matakon.
"Sapunapi Amaq, wenten ius mantun tiange seger? Dadi tiang nelokin?"
87
