Sakewala Maman matanggeh mancan gelan Mamane nyak ajak nganten apang ada ajak Maman makengan, sawireh Jumah di Lauq tusing ada buin anak ane sendem ngugu yen Maman suba tobat."
"Sira adan gelan Pamane, ajak dong meriki apang tiang nawang."
"ia madan Nurwandira adinne Amaq Badrun ane paling cerik. Sampun bebalu ngelah panak besik mara matuuh duang tiban. Mirib Made nawang, kocap la ngabaang kopi dugase Denda nginep ipidan di Sembalun." Loq Sudangsa kenyem matuingetang.
"Ooh nika? Mula jegeg Man. Kocap ngelah gaginan nyait, mawinan baanga nyilih pipis teken kantor BRI ne di Belong. Nggih tiang setuju pesan yen kenten. Pidan lakar juang Man. Tiang pasti ajak makejang lakar nelokin Paman ka Sembalun." Raosne Made Sinar nyalamin pamanne saking lega bayunne. Pamanne kenyem nampenin.
Di kamar Lale Dumilah osah mamulisah ka panesan. Nanging yen tatab raganne karasa dingin mapeluh tur beseh cara gadebonge busuk. Gusti Ngurah amung bengong sedih madalem rabinne buka keto. Mireng Lale Dumilah daat-duut, Amaq Rah macelep ngusudin cokorne. Pak Badrun masih ngituk ningalin sawireh paa kayang betekanne beseh tur mapeluh dingin. "Aah kena sokeq" kenten raganne ngarenggeng.
Amaq Tirah nyemak kampekne lantas mesuang penawar cara tain kambing limang besik campurina yeh anget anggona morehin cokorne. Beten cokorne katatakin ben don biu mas. Lale Dumilah daah-duuh naanang sakit, kebus alah dadang baan kau-kau. Yeh paningalanne nyrekcek membah cara anake kadusdus andus. Baliane buin pesu nginang. Pan Kobar nanjen apang madaar malu sawireh sampun nandes tengah lemeng, nanging raganne ten nyak sawireh lakar ngabih Lale Dumilah nganti karuan patanggal ubade.
"Silak Amaq Badrun sareng sane lianan ngajengang dumun.
85
