Made Sinar teka nyemak waskon lan embere abana ka kamar mandi.
"Tu Ngurah padalem tiang Tu Ngurah tuyuh ngurus dewek tiange. Patutne tiang sane ngayahin Tu Ngurah, mangkin dados mabading. Ten nyen tiang tulah Tu Ngurah?"
"He, ngujang sayang ngomong keto. Kaden Denda jani sakit? Apa salahne tiang ngurus gelah tiange padidi. Awak tiange ragan Dendane suba mamesik. Saenun tiange nyidang ngelaksanaang sing baang tiang anak len ngencanin. Denda lakar enggal seger. Makejang timpal tiange nulungin ngalih ubad. Gedenang bayune, eda kalah semangat." Gusti Ngurah ngusap yen panon rabinne saha nyemakang suah nunden rabinne masuah. Made Sinar buin teka ngaba kopi susu ajak jaja roti, sumping, cerorot mara lebeng.
"Nggih dong ngawedang dumun, mungpung kari anget. Niki jaja sasenengane"
"Beh Luh Ade magenep baanga, nyanan lebihan tiang makita meju kenkenang?"
"Badah, dados kenkenang. Kaden wenten ember? Yen ten nyidaang meju di embere depang apang gandonga ring Tu Ngurah ka WC. Tiang masih nyidang nyinggik Denda ka kamar mandi, kenken?" Made Sinar kenyem ngalahin ka paon. Gusti Ngurah ngasih-asih rabinne apang ngawedang, naar jaja carorote manis nyangluh. Ibunne masih milu nelokin mantunne apang seleg naar susune, sawireh uli tuni ten bani naar napi-napi. Takut yen nyanan makita manyuh utawi meju. Mara raganne muktiang kenken Gusti Ngurah nyayangang ngencanin raganne. Sampune suud ngawedang, Luh Purnama teka ngabaang ajengan sawireh sampun disne ngajengang. Cangkire jemaka abana ka paon.
"Nah mangkin ngajengang dumun. Nyanan enggalan teka baliane
