gedeg basangne. Batisne Lale Dumilah urut-uruta sambilanga ngeling lantas pesu nyagjagin pamanne.
"Paman Sudangsa, Pak Badrun, mungpung paman meriki mangkin tulungin tiang. Kenken ya ban paman apang maan ngalih balian ane nyidayang ngubadin Mekel tiange Lale Dumilah. Miribang di Sembalun utawi di Lauq ten kuangan anak bisa ngae pasangan, pasti bisa masih ngae ubadne." Made Sinar ngalendotin pamanne.
"Tenang Denda Made, jani maman lakar mulih malu ngajak Pak Badrun lakar ngalih belian gurunne Pak Badrun. Dumadak ada ubadne. Maman masih merasa sanget kapiutangan teken dane Gusti Ngurah ane suba sida matemuang Denda ajak maman. Nah, selegang nongosin dane. Maman mulih malu ajak Pak Badrun," kenten pamanne.
Sawireh lakar luas ke Sembalun, Wayan Rempuh nyediaang Loq Sudangsa, Pak Badrun, Wayan Galang, lan Nengah Sunia apang madaar malunan. Sampune suud madaar sregep Nengah Sunia mataki-taki mreksain montorne, malihin lengisne, ban lan ane lenlenan. Makejang sampun beres kayang jaket, senter lan amik-amikan saperlune.
"Gusti Ngurah, Wak Pan Kobar tiang pamit langsung mangkin majalan apang enggal malipetan sapetenge niki, ten kenten Pak Badrun?" Kenten raosne Nengah Sunia.
"Nah, melah-melahang di Jalan. Yadiapin kasusu nanging eda ngebut. Alih pang pada selamet. Kenten masih Loq Sudangsa, Pak Badrun tiang matur suksma, dumadak apang rahayu pajalane tepuk ane alih." Gusti Ngurah Darsana nyalamin tamiunne. Made Sinar lan meme bapanne makelo nyalamin Loq Sudangsa. Ibu lan ajinne Gusti Ngurah milu ngatehang ka rurunge. Montore magerung budal. Makejang ngaptiang apang maan ubad ane sida nyegerang Lale Dumilah. Sasampune pada malinggih mara lantas buin masoda sawireh ane
