pula-paline sapisanan manut adate iriki. Sampunang malih lanturanga mantuke ka Sengkol," keto pamanne meragatang raosne. Misanne ngempusang asep rokonne matadah brangti.
Pamanne mesuang lekesan lantas nginang. Peesne kecah-kecuhanga di samping undage.
"Nggih Mamiq, Kak Wiradana sareng sami. Yadin menggah tiang gumanti nunas pangampura pang banget. Tiang sampun ane ngawinang Mamiq sareng sami sungkawa. Nanging tan pajamuga manawi sampun jodoh sane matemuang dewek tiange sareng Lale Dumilah. Tiang tetep ngaptiang mangda polih matemu, nunas pangampura sareng anak lingsir. Tulung sampeang salam hormat tiange ring inaq Ian mamiq," kenten Gusti Ngurah Darsana matur alon, banban saha nyerahang surat balesan teken pamanne. Kenten masih aji Ian ibunne, mina kadi Pan Kobar busan-busan nunas pangampura indik okanne ngambil Lale Dumilah malarapan baan mararik.
Jam lima sanja reraosane pragat. Tamiune mangkin nunas mapamit, Lalu Wiradana nyalamin adinne lan Gusti Ngurah Darsana. Gusti Ngurah Gede, rabinne. Pan Kobar, lan Kliane masih masalaman lantas ngatehang teked di rurunge.
Sanjane nika karasa ongkeb, kebus beeng. Langite ucem kabebeng gulem. Lale Dumilah kari bengong, padelengdeng yeh paningalanne sadsadina aji saputangan. Ibu lan ajinne pada ngarumrum nunden mandus malu apang segeran bayune. Gusti Ngurah nandan rabine macelep ka kamar magenti panganggo lakar masiram.
"Kenken Denda, enu sesek rasa tangkahe? Yen perlu mai onyang pesuang elinge apang piangan rasane. Eda simpena sedihe padidi." Gusti Ngurah meluk rabinne. "Ten sapunapi Tu Ngurah, kaden Tu Ngurah nuturin yen tresnane mula madasar baan katulusan, kasucian,
