TANGIS MATUNGTUNG MANIS
Sanjane nika langite ngemu riris, suryane katawengan amubu, guleme ucem, angine baret magriungan kaselagin baan tatit, kilap pacederder ngaresresin ati. Tumben Lale Dumilah dereng masare. Biasanne suud madahar bajange maka dadua saling paliwat nyangkutin galeng guling, masare nganti sanja. Mangkin Lale Dumilah iteh ngumbah di kamar mandi, Luh Purnama nindes panganggonne sambilanga gendang-gending. Liang kenehne sawireh punyan tresnanne sampun pada mabunga. Luh Purnama lan Wayan Galang sampun cutet, buntet kenehne rumaket lakar mabesikan yen kantorne sampun nadiang nganten. Lale Dumilah yadiapin liang tur lascarya ening nyerahang tresnanne teken Gusti Ngurah Darsana, nanging marma kenehna nerusang kuliahne sawireh gelanne dereng karuan kari deriki nganti tamat kuliahne. Kebyah-kebyuh bayunne inguh, runtag. Sabilang ngucekang panganggonne masabunan, marasa ngetor jerijinne kabejek-bejek teken gagelanne. Mara limang dina kalahina teken Gusti Ngurah, karasa sampun abulan. Napi buin yen nganti kalahina pindah ka kota lenan, sawireh raganne mula dadi staf ane lakar mepes mapindah-pindah. Rasa tuara nyidaang ia lakar mapasahan. Nika ngawe kenehne tuara eneh-eneh. Lantas ia negak mategtog di natah kamar mandine ngisi umbah-umbahane enu bek misi sabun. Yeh paningalanne ngembes mili patemuas. Luh Purnama ane nguratiang yehe di kamar mandi sepi tuara ada masreyokan, dadi sangsaya kenehne, takut yen timpalne limuh utawi sakit. Derika lantas ia alon-alon maekin tur mungkak lawang kamar mandine. Dapetanga Lale Dumilah negak beten, ngepes yeh mata sambilanga ngisi umbah-umbahane.
"Ha, Denda ngudiang dadi ngeling mememan dini? Nyanan sakit. Tiang sing nyak tempuina teken Tu Ngurah. Kadenanga sing nyak
1
