sisan gajihne kacelepang ka tabunganne suang-suang. Apang ten ja bisa nunden anak nabung, nanging patut masih dadi conto lan ngerti indik tabungan. Napi ane sampun mabukti mapikolih kalaksanayang di Atambua kacobakang di Bima. Mula nika ane dadi tatujone raganne kapindahang ka Rababima.
Risedek raganne malinggih ngetis di terase sareng rabi, lan Meina ngempu okanne saget ada bus mareren di arepan umahe. Uli buse ada anak ajaka lelima tuun alang-eleng matakon teken Pak Mustamar ane lantas ngatehang macelep ka natahe.
"Oh, Bliq Wira, mamiq lan inaq rauh," kenten Ratna Dumilah bangun nyagjagin.
"Iiih, nika Beli Yan Galang lan Luh Ade masih milu," Meina milu malaib. Gusti Ngurah nyangkol okanne milu nyagjagin. Inaq Wiradana ngelut Ratna Dumilah tan mari nangis. Kenten masih Yan Galang lan Made Sinar ngelut Meina matungtung tangis.
"Mamiq, Kak Wira, inaq, silak ngiring ka tengah malinggih. Meina, ajak beline lan adine macelep malu!" Kenten Gusti Ngurah nyapa tamiunne ane matadah sendu. Teked di kamar tamu Inaq Wiradana ngelut mantunne, lantas ngangkol putunne kadiman kasih-asih saha paterebes yeh panonne. Magilihan mangkin Made Sinar meluk Ratna Dumilah lan Gusti Ngurah saha ngeling sasenggukan. Lalu Wiradana, mamiq lan Wayan Galang rasa belbelan mekek angkihanne, nangges yeh panonne nagih nrebes pesu.
"Oh cucungku, selamet tati, selamet. Oh Nenek kaji sak Kuasa, matur suksma sampun ngicen kaselametan mas mirah tiange sayang," sesambatne Inaq Wiradana sedih. Sorene nika nadak tuun ujan riris satmaka ngawarangin tangis bagiane matemu. Meina ngenggalang kapaon tutuga teken Luh Ade lakar ngae wedang. Ratna Dumilah
374
