satya salunglung subayantaka, malah jaga mapamit lampus yen tiang ngutang raganne di Bali. Tiang erang yen kasengguh tan satya ring janji. Nika mawinan tiang awor salulut muktiang pitresnane, saking pangapti
yen presida beling manawi ajin Idane jaga luluh tur ngalugrahin titiang nganten katimbang madue putu babinjat. Dayu kaonin tiang meriki tan mari saha pangapti sekadi ngantosang ulungan durene sane sampun
nasak. Petang sasih suenne, bobotanne Dayu sayan ngenah. Aji lan ibunne menggah pisan santukan Dayu terus terang ngangken yen sane nuwenang belingane wantah dewek tiange. Dayu Sutresni kapuladara tur jaga kakuret ring dokter utawi balian sane sanggup ngulungang belingane, nanging Dayu nenten nyak nuutang. Mrasa ring belinganne sayan ngedenang, raris ibu sareng ajinne ngrencanayang pacang nyangkepang Dayu sareng mingsikinne sane sampun madue rabi nanging dereng madue oka satmaka anggen nekepin jengahe madue
oka beling ten wenten sane ngakuin."
"Beh, kari dogen ada anak ane dereng ngerti yen manusane saha sarwa pranine sujatinne patuh di ajeng Ida Sang Hyang Widhi Wasa, ane pinaka Sang Sangkan Paraning Dumadi. Kenten masih indik karma utawi jodo wiadin lekad, idup, lan matine mula titah Sang Hyang
Tuduh. Nanging Made sampunang tandruh. Yen anake kaliput dening loba angkara, kalingke kelangan panak, kelangan pitik emasin masiat. Terus kenken lanturanne dadi payu nganten?" Patakonne Gusti Ngurah matadah kenyem nolih rabinne.
"Sapuniki, saking ten sida naanang dukalarane padidi lantas raganne ngirim surat dagingne nuturang sapari polahe sane alamina, saha ngaptiang apang tiang gelis mantuk. Tiang ngambil cuti kalih minggu antuk alasan nganten. Saking rarembugan nyama kalih bapan tiange jumah, kaputusang tiang nganten ngarorod manut adat iragane di
366
