ngrasayang kahanane kadi mangkin," aturne tan mari pada nyalamin Gusti Ngurah, Ratna Dumilah lan Meina. Makejang ngecup mangelingin Gung Nantha ane sampun pindah kapelukan ibunne. Sesampune masalaman ajak pilot, copilot lan pramugarine makejang ka saksinin olih polisine, Gusti Ngurah lantas pamit lakar ka umah Dines BRI ne di Rababima. Pegawe BRI ne kayang kurenanne suang-suang samian rauh kumah di nese ngucapang selamet, ring Gusti Ngurah sakulawarga. Barang-barangne Gusti Ngurah di gelis kagagah, koper-kopere kabukak, isinne kasusun kacelepang ka lemarine di kamar ane mula sampun sayaga ngantos pangrauh raganne. Nika awananne Gusti Ngurah, rabinne, okanne, lan Meina digelis nyidayang masalinan. Sorene nika manut rarembugan para istri pegawene saking tulus ngawentenang syukuran ngundang Pak Kyai nguncarang do'a lan zikir angayubagia ring Allah SWT sane sampun ngicen kaslametan sareng sami. Sajaba pegawe BRI wenten masih Kepala Bank BNI, BPD, lan sameton Baline ane mireng indik raganne kabencanan milu rauh nyelametin.
"Inggih, matur suksma antuk katulusasihan para sameton sami nguratiang titiang yadiapin ja wau kenal mangkin kalaning tiang keni sengkala. Dumadak malarapan antuk puniki numbuhang pasawitrayan iragane sane rumaket," ucapanne Gusti Ngurah ngasor. Makejang panamiune marupa kopi, teh kayang sedak jajanne kaurus baan istri pegawene.
Sesampune puput selametane, tamiune sami nyalamin lantas
mantuk kumahne suang-suang. Kari Pak Syamsudin, Kepala Tata Usahane, tukang kebon, lan sopire dogen gumanti lakar ngajak Gusti Ngurah sakluwarga ngajeng di restoran pinaka panyambrama sawireh dereng nyidayang masak jumah. Rombongane pesu ngojog Rumah Makan Taman Sari, ane kasub baan masakan kambing panggang,
359
