Tan caritanan di jalan ngaliwatin bukit lan pengkolan nagel siku ane madurgama, jam dasa raganne sampun teked di jeronne. Gusti Biang Suci lan Gek Sri sampun mengaang masakan be pasih mabasa magenepan. Pamanne, Gusti Made Getas pensiunan polisi masih rauh nyagjagin gumanti nyaritayang indik raganne matugas di Jawa nganti pensiun. Mangkin raganne sareng okanne Ngurah Mataram mawali ka Lombok. Okanne sampun masuk di Fakultas Pertanian UNRAM. Okanne ane istri Gusti Ayu Cakrawati sampun nganten ajak dr. Santoso anak uli Malang. Nika masih ane ngawenang Gusti Ngurah Gede lan rabinne las kayunne ninggal jeronne di Tanjung mantuk ka Janaloka, sawireh sampun wenten rainne ane nyeledi di Tanjung.
"Nah adi Made Getas, sawireh jani Getas suba neh jumah beli lakar sasinahan makisid uli dini ka Janaloka. Apa ane dadi sesanan adat lan secara dines dini patut Getas ane nyambungin. Indik pamupon tegal, carik gelah beline dini atengahne anggon suba mawidesa lan ngaci di mrajan. Buin atengane kirimang ka Janaloka apang ada anggon beli mekelin panake Gek Sri masekolah. Nyanan beli lakar nuturin panyakape apang manipuan maurusan ngajak adi Getas jumah dini," kenten pandikan rakanne saking tulus.
"Nggih, kenten ja ledang kayun beline tiang matur suksma. Sampun 25 warsa tiang dados polisi milehan kantos pensiun ten ngelah napi sajaba tanda jasa, penghargaan, lan panak dadua. Santukan deriki beli ngicen nongosin umahe niki, umah tiange ane kari di Surabaya lakar adep tiang. Sira nawang deriki maan meli carik utawi tegal nyang asikut satmaka kembulan malajah dadi wong tani," atur rainne saking bungah kayunne.
Mula adung pasemetonane sareng kalih. Kenten masih rabinne suang-suang pada saling tulungin yadiapin ngenahne Gusti Biang Suci
334
