"Ooh denda Milah, lacur pesan nasib tiange. Mulih uli dini dugas nunas pipise montore mati di SoE. Sawireh suba peteng terpaksa nginep di hotel. Saking dingin lan kasepian terpaksa tiang pules dadi akamar ajak sopire. Tengah lemeng kamar tiange gedora teken polisine. Mara ampakang tiang,...ooh dik Milah, Pak Kirno kurenan tiange ada di samping polisine. Raganne ane gumanti ngalih polisi apang nangkep awak tiange, saking laporan timpal dagang jamune pembantun tiange ipidan. la ngaku mepes nepukin tiang ajak sopir tiange nganggon kamar hotele ento malila cita. Tumben jani tiang nginep lantas kadapetan," caritanne Hendun ngusap yeh paningalanne deres ngetel di dadanne.
"Terus, kenken kaputusanne Pak Kirno nepukin mbok malaksana serong keto?"
"Naah, napi nyen buin raosang, nasi sampun dadi bubuh. Terpaksa beseang, Pak Kirno niwakin tiang talak telu. Manut kaputusan Pengadilan Agamane tiang bareng patut kena hukuman kurungan 6 bulan saha musti nganten ajak sopir tiange Elo Masiga. Oooh, nguda kakene pesan nasib tiange. Legane akijepan bakat tohin ben jengah lan mabui. Yen denda ngelah tulung malu tiang baang nyilih pipis Rp 500.000,00 anggon nebus apang ten kanti mabui. Elo Masiga amung ngelah pipis Rp 1.000.000,00 dogenan," raosne mamelas.
"Beh, sujatinne tiang madalem mbok. Nanging benengan niki ampurayang tiang ten nyidayang nulungin. Tiang elek pesan teken rabin tiange bakat dalih tiang mamitra ajak Meina saking pisunan mboke. Makejang ane ajaka ka Kupang teka dadi saksi bareng matutang, nindihin Tu Ngurah. Jani mbok teka lakar saduarepang tiang ajak Tu Ngurah lan polisine ane ngawal raganne ka Kupang dugas ento, kenken apa mbok sanggup?"
"Oh, ampurayang tiang denda Milah. Tiang hilaf, napi kaden
267
