ane tedun ajebos, nanging tiang tetep di montore nongosin pipise. Suud
mabelanja terus mulih meriki dur ten mareren-reren,apang ten petengan.
Nganti minum lan naar roti masih di montore. Teked deriki langsung ka
kantor BRI nyelepang pipis, mara ngatehang tiang ka asrama. Nah yen
amun nika kanti ada anak ngorahang Pak Ngurah maan ngajak Meina
ka hotel utawi kija-kija, tiang ane paling malu kaberatan tur lakar dadi
saksine. Sira sujatinne ane ngalapor Bu? Tiang ten narima, anggapa
napi tugas tiange dadi pangabih. Niki pisuna Bu, lakar tuntut tiang,"
kenten aturne pak Eddy saking sengit kenehne.
"Bu, sira adan jatmane ane ngalapor Bu? Sainget tiange sampun
amasa lebih ngiring Bapak dines utawi torne, raganne ten taen nyopir
padidi. Tiang ane dadi pikandel, yen perlu dadi buruh lan saksi hidup
mati. Napi taen raganne pesu padidi ten ngajak Ibu, utawi pesu
mabelanja padaduanan ngajak Meina?" Aturne David ane masih milu
sengit. Ratna Dumilah amung nguntuk sedih, padelengdeng yeh
panonne, nanging saru kusapin baan saputanganne. Di kayunne mrasa
pelih nuduh rabinne tan paselidik teken sopirne.
"Bu Ratna, apang Ibu ten sumanangsaya ring tiang, ngiring
benjang atehang tiang ka dokter apang mreksa ka prawanan tiange.
Kaling ke lakar serong sareng Tuagung, pacar seken kayang mangkin
tiang dereng ngelah," aturne Meina sigsigan ngeling.
"Baah ..., yen keto dadi dong tiang ngalamar dadi pacarmu Meina.
Rasanne bas makelo tiang dadi bujang bingung. Dados nggih Bu?"
Raosne Pak Wisnu makenyem.
"Aah, Pak Wisnu. Anak ngraos serius Pak Wisnu macanda. Tiang ten nyak, tugas tiange kari liu dereng pragat. Ngalih belin tiange di Cakranegara, lan bapak tiange dija kaden ten tawang tiang tongosne kayang jani," pasautne Meina nolih Pak Wisnu.
257
