kayang jani," raosne Ratna Dumilah negesang.
"Beh masa jangka meno denda? Mula nenek kaji sak kuasa nentuang irup lan matine, lahir saha jodoh manusane. Nah yen meno dik Milah, tiang pamit ja malu. Kari liu langganane dereng maan bagian. Makasih, salam ring Bapak," raosne lantas majalan pesu atehanga teken Ratna Dumilah teked di pamesune. Hendun menek montor lantas budal. Meina malaib uli paon nyagjagin Gung Nantha ane nangis di kamarne, popokne belus lantas gentinina. Salanturne serahanga teken ibunne lantas pasusuina. .
"Bu, tumben Bu Kirno ajebos ngorta. Biasanne ten kuangan raos, cara dalang tiwas, ane mabalih ibu dogen padidi." Kenten Meina ngeturin masemu guyu.
"Ah saja, uli pidan mula keto. Cocok dadi dagang roko, liunan andusne. Ia mai gumanti nyemak pamelin payasane payuang tiang aji Rp 100.000,00 mimbuh ongkosne Rp 10.000,00 Nah pang ngelah anggon temon-temon yen mani puan pindah uli dini."
"Wiakti Bu, bandingang teken ngae, astel pagaen deriki bisa aji Rp 150.000,00 nganti Rp 200.000,00. Deriki yen ten anak sugih ten nyidaang ngelah payasan gading."
Kenten pabligbagan lan gagonjakanne Ratna Dumilah ajak Meina sambilang ngempu okanne yen sampun pada suud nyakan. Di kenkene teka Ibu David utawi Ibu Markus nglalinin. Yen katuju rainan kajeng Kliwon, purnama wiadin tilem Ibu Made lan Ibu Cenik ane teka lakar ngaenang banten sawireh tawanga Ratna Dumilah dereng dadi mabanten, okanne kari alit. Mrasa pesan kenken leket pasawitrayanne pada uli Bali,yapin mara pada kenal di Atambua,luwihan teken manyama. Yen Gusti Ngurah torne pasti Pak Made nyambangin sambilanga malali ngajak kurenanne. Nika awananne raganne tuara ngelah rasa sangsaya
237
