pacana sambilang ningalin poton belinne rasa matemu nembus langit biru.
Maninne semeng Gusti Ngurah ngicen Meina surat saha amplop maalamat rapi katujuang teken Wayan Galang di Br. Jeruk Manis, Cakranegara, Lombok, lan NTB.
"Meina, yen surate suba pragat lantas dadiang abesik kayang potone pada, kirim ka pos jani. Beline sinah lega kenehne nerima kabare tenenan," kenten Gusti Ngurah.
"Ooah, dadosne Gung Aji sampun ngarya surat, saha potone nika? Inggih surat tiange sampun puput. Mangkin tiang ngirimang ke pos," pasautne Meina ngenggalang ka kamarne nyemak surat lan poto dewekne edenganga teken Gusti Ngurah.
"Nah, cukup kanggoang amonto. Kema celepang ka amplope, lantas kirim!" Kenten pandikanne Gusti Ngurah saha nyingakin okanne ane sedeng siramina teken ibunne. Ratna Dumilah milu makenyem ningalin Meina pesu suir-suir ka kantor pos.
Mulih uli pos Meina natad bungkusan nylibsib ka paon. Ajahan saget sampun teka ngaba nampan misi nasi goreng telung piring, coca c ola duang botol, bier abotol, lan kotak tar mapita barak jejeranga rapi kayang gelas, sendok, garpu di meja makan.
"Tuagung Aji, Bu Ratna, mangkin ngiring sarapan dumun. Tiang wenten aturan sematra pinaka syukuran indik lintihan riwayat hidup tiange sida kapanggih. Puji Tuhan dumadak Tuhan Yesus lan Allah Bapa di surga setata ngicen selamet, amin." Meina nandan Ratna Dumilah lan Gusti Ngurah ka meja makan. "Silakan bukak Bu."
"Oh, matur suksma, salam sejahtera lan selamat ulang tahun ane ke-17. Madak apang panjang umur." Kenten Ratna Dumilah ajak rabinne
219
