teken sustere lan timpal-timpale apang sing petengan di jalan." Gusti Ngurah lantas nyalamin suster Ida. Meina nyalamin timpalne lan meluk suster Ida makelo gati lantas menek ka montore.
Alon-alon montore pesu uli panti asuhan mabelok ngojog ka komplek tokone lakar mabelanja. Meina kari masebeng sendu, busan-busan ia ngusap yeh paningalanne.
"Nah klian kaden tonden pada madaar. Silakan madaar malu, ene suba tengari."
"Ooh kitorang sumakan Pak, sampun wareg," pasaut polisine.
"Tiang masih sampun di asrama Pak. Tumben marame-rame ajak timpal-timpal tiange satmaka perpisahan. Napi niki artinne tiang lakar luas jooh ten buin mabalik?"
"Ah, eda ngomong keto Meina. Mirib timpale mula kangen. Nah lamun suba pada madaar jani tiang lakar mabelanja malu ka toko. Klian antiang malu dini," kenten Gusti Ngurah morahan teken polisine apang nongosin pipise di montore. Raganne tuun tutuga teken Meina katoko. Gusti Ngurah meli susu bayi, roti gabin, roti manis, selimut bayi, mainan plastik warna-warni lan tusing engsap minyak telon saha anggur beranak.
"Pak, tumbasang kocap sarden persediaane sampun telas," aturne Meina.
"Ooh saja. Das engsap meliang ibune parfum, lengis cendana lan kayu putih." Sesampune cukup bablanjaane, makejang barange abana teken Meina ka montore. Jam 2.30 siang montore magerus majalan ninggalang kota Kupange bek makupuk baan buk ngungsi margane ane lakar ka Atambua. Plaib montore gilik alah angin lilus di margane ngaliwatin tegal lalang lan padang ane soklat tuh gaing. Di
211
