saking darsana, kasuratin matueling kapertama, kadua lan panguntat. Yen pengkung mara kajuang ka pengadilan. Alah dedehang nasabahe sayan ngerti teken swadarmanne suang-suang yen bange mula tatujonne lakar nulungin rakyate uli kadrowakan pangijon lan lintah darate.
Kenten masih Ratna Dumilah penter ngulanin para istri pegawene ulian arisan apang nyak makumpul melajah masak, nyait, saling tukar pengalaman ngurus pianak lan kulawargane suang-suang. Saling delokin yen ada ane kena panca baya utawi selametan. Gusti Ngurah Darsana biasa maang pitutur yen arisane kadaang di kantor ane kabarengin teken para pegawene makejang. Katerangang indik kasibukane di kantor, tanggung jawab lan bahayane di jalan yen katuju maan tugas ka desa-desa, lan nyemak utawi nyetor pipis majuta-juta ka Kupang. Kenten masih apang pageh lan jujur ngaba raga, sawireh anake ane magae di pipise biasanne lacur ben pipis liwat korupsi, maan sogokan, utawi maling. Sujatinne pemerintahe utawi Direksi BRI ne sampun ngitungang yen gajihe ane katerima sampun cukup kanggon hidup sa kulawarga manut pangkat lan jabatane secara saderana. Nah yen nagih ngulurin indria, mamotoh, hidup mewah sinah kuang. Nika awananne para istrine apang bisa ngareringa bea hidupe apang manut teken gajihe, pikolih kurenane ngabulan. Yen dadi baan nepesang apang ada masih masisa anggon tabungan, apang ada jemak di katujune ada gae utawi kaperluan nadak. Masak iraga nganjurang anake apang nabung lantas iraga tusing bani nabung? Mara bossne ngeraos kenten liu para istrine pakerimik sawireh tuara taen oraina akuda kurenanne maan gajih. Ada masih ane ngalapor.
"Pak, aku tak tau gaji. Pokoke sawai-wai dijatah sangu oleh Pake"
Ada masih.
"Pak, tiang amung ngarapin gen. Beras, lauk, kopi gula, sabun,
175
