pakean resmi, Gusti Ngurah nganggo setelan jas, lan rabinne nganggon kamben endek, kebaya lan sanggul cara Bali. Salanturne lantas sarapan nasi goreng lan kopi susu ane sampun kapesen ibi sanja teken pelayan hotele. Suud sarapan Gusti Ngurah ngambil map surat-surate ane lakar maba ka kantor, rabinne nyelepang koper pakeane ane misi barang- barang maarga kalemarine lantas ka kancing. Raganne amung ngaba tas tangan misi kosmetik, meka cenik, suah lan pipis acukupan.
"Beh, ribed pesan rasanne, tumben dadi nyonya Kepala Cabang BRI. Kimud tiang Tu Ngurah. Rasanne kari mapupuk cekuh, selung-selung dadi anak tua. Nyanan matemu ajak anak sampun mapengalaman, pegawe lan kurenane ane sampun pekas-pekas."
"Ah, sing nyandang kimud. Yadiapin nguda anggap iraga liunan ngelah penawang tur patut mimpin pegawene makejang. Nanging sing dadi sombong, iraga masih perlu liu malajah siman anake dini. Nyen nawang uli kapolosan anake tumbuh pawirasane melah." Sedeng iteha ngobrol saget teka montor BRI ne mapagin. Sopire tuun ngorahang sayaga lakar majalan ka kantor: " Kenken Pak, Ibu, mangkin lakar majalan ka kantor?"
"Oh, jani Pak David, apang maan matemu ajak pegawene malu satonden upaoara. Tiang meled makenalan, apa Ibu-ibu kurenan pegawene milu teka?" Gusti Ngurah masaut lantas ngancing pintu saha ngajak rabinne kamontore. Alon-alon David nyalanang montore ngojog ka kantor BRI. Tuun uli montore, Pak Abu nyagjagin lantas ngenalang Gusti Ngurah lan rabinne teken pegawene makejang kayang Ibu-ibu Dharma Wanitane ane sedeng repot ngatur meja ajak Ibu Abu di aula ane biasa kanggon patemuan. Enggal pesan Gusti Ngurah lan rabine wawuh ngajak pegawe lan para istri pegawene makejang. Pak Abu ngajak Gusti Ngurah ka kamarne apang maan nyingakin naskah serah-terimane ane
157
