buin poan. Ten wenten barang napi ane aban tiang sajaba koper pakean lan buku-buku. Barang lenan ane ada di umah dines mula barang invantaris. Pak Ngurah tinggal nyelepin dogen. Pembantu tiang mula ngajak uli jumah ane ngempu panak tiange uli cerik kari di Denpasar kayang mangkin," Pak Abu negasang saha kapatutang teken kurenanne.
"Nggih Bu Ngurah, duang tiban deriki ten ngelah perkembangan napi. Yen Ibu perlu ngalih pembantu, liu ada deriki. Nanging perlu waspada apang saja tawang umahne lan reramanne ane mula nyak nanggung jawabang yen mani poan ia makaad mulihne."
"Nggih matur suksma Bu, dumadak para pegawane nyak nulungin yen tiang merluang ngalih pambantu. Mangkin kari padaduanan mirib elah, dereng ada anak carik."
"Ooh jakti, kurenanne David mirib nyak deriki. Panakne sampun kelih-kelih."
"Nggih Pak Ngurah, ten merasa niki sampun jam dasa. Tiang pamit malu apang Pak Ngurah maan mangaso sawirah itunian lesu mamontoran joh di margane ane rusak," bapak lan ibu Abu bangun lantas pesu tututina teken Gusti Ngurah teked di montorne.
Sasampun tamiune budal Gusti Ngurah ajak rabinne macelep kakamarne masalinan saha mesuang panganggo ane lakar manggo buin mani. Rabinne maluan ngojog pasirepan tur ngebatang saput gebyog ane mula kasediaang. Gusti Ngurah amung kenyem maekin.
"Tu Ngurah, tiang kenyel pesan mamontoran. Bangkiange ened rasa keles, matan tiange kiap, nanging dingine ooh patuh rasanne cara jumah di Baledan," Ratna Dumilah ngedeng tangan rabinne apang sirep, nanging Gusti Ngurah mabading ngambil balsem.
"Nah lamun keto mai urutin malu bangkiang lan tundune ben
155
