Darsini lan Made Sinar nutug Gusti Biang Ngurah ka bale dangin. Pan
Kobar lan kurenanne milu makiles ka sakulune saking lelehne di kapal.
Gusti Ngurah sidori matangi nyangkol rabinne ka kamarne. Petenge
karasa ening, makejang pada aris sirepne ben lesune magae.
Di dinan karyane Gusti Ngurah Darsana ajak rabinne, lan rai-rainne
semengan sampun masiram mabresih-bresih, lantas mabusana sarwa
bebali. Makamben sakordi, matoros, maselendang utawi makampuh
gringsing, angkeb raga selulut gadang. Pusunge gagonjeran. Sangginge
Ida Bagus Ngurah sampun rauh saha pirantine sami sregep saha
sesantun. Eteh-eteh pemandesan luire klungah nyuh gading makasturi,
pedangal dapdap, isepan, sedah lekesan, caket, cermin, miwah linggis
sampun tegep makejang.
Sampun tatas dedauhane lantas pemandesane kakawitin
saking Gusti Ngurah Darsana, rabine Ratna Dumilah, lan rai-rainne
makakalih. Makejang kaabih saking asih olih aji, lan ibunne makadadua.
Sametonane lenan ngayahin ngisi cermin, ngabaang yeh anggen
makemuh. Sesampune makejang pragat mapandes lantas buin maseh
nganggo wastra sarwa endek. Gusti Ngurah makampuh bludru, mabaju
sapari krem, madestar songket. Rabinne mawastra endek gadang
nguda, mabaju brokat krem, maselendang barak nguda. Rainne maka
dadua makamben lan mabaju pepatuhan, endek dadu maya lan brokat
biru nguda masalendang kuning gading. Makejang masekar maempakempak sandat, sruni, lan cempaka emas, paut anut pesan teken
payasanne. Upacarane ane kalaksanaang mapetik, maoton
magogo-gogoan lantas majaya-jaya, lan natab banten paotonan suang-suang.
Suud motonan lantas buin magenti payasne nganggo sarwa
139
