dukuh gelis, inggih sapuniki ratu, ipun kocap kesengan, wastu ipun kakembarin, kadi apus, kawulan cokor i dewa.
15b.
112. Selam wenten kalih dasa, nene sareng kakembarin, soroh selam sami angob, manungkul manunas urip, titiang raris melaib, parek ring cokor i ratu, malih ipun mamatbat, soroh nene mangembarin, lintang gangsu1, rawuh ring cokor idewa.
113. Kadan ipun sapuniki, kranan ipune mati, sang prabu raris mangetor, ban krodane tidong gigis, angkihane mandiyis, baag biying mirib kencu, matane manulirak, raris mametek manuding, munyi gangsul, ne cai ambul apa.
114. Doning keto orahanga, tingkah nyane Tandurahim, tong duga I Dukuh linyok, maorahan teka mai, idep kaine jani, nemani pacang pagebug, I Agung Pamamoran, iba kal adokang kai, pacang ngamuk, ne jani agenang pisan.
115. Prabekele pada kagiat, bane enggalan katari, tonden ada pangrawos, dadi macebur manangkrik, paseret ngembus keris, Raden Denda Batu Karu, Raden Jayeng Patra, lian Raden Citra Rukani, I Mastrangkul, len Mas Sura Dilaga.
16a.
116. Malih soroh para wangsa, Sura Sumitra makadi, len Dukuh sareng ngokok, pada nunas manyatianin, mamunyi pada nyerit, titiang ratu anggen caru, yan tekaning yuda, titiang lawana masabit, titiang ratu, bangke majalan wastanya.
117. Sampunang ratu macingak, karin titiange maurip, cager titiang ipun kawon, tan wenten ipun ngundili, sang prabu manyawurin, kulkule gebug pang bulus, nyen ditu soroh lintah, enggalang jani malaib, lawut bangun, parekane mangenggalang.
118. Kulkul suba mabiayuhan, mamunyi sating tambungin, kocap wong Mekahe, reko, kataurag mamiragi, pada nyaluk kulambi, ngaba bedil tumbak tulup, dadap paresi tamiang, tingkahe manggagap wisti, pada muwug, bilang jalan masasumbar.
