Mantri masih suba kone usan ngrayunang, makayun kone ida malanjaran. Dening tuara ada api, dadi I Jrudeh kandikaang ngidih api sig kubun Ida Raden Galuhe. Lantas I Jrudeh majalan. Sasubanne ia nganteg di pondoke, Ida Raden Galun makatetelu sedekan kone malinggih di ambene ngemban okane. Penyeroanne sedekan kone di paon. Mara I Jrudeh makaukan, pirenga lantas. teken Ida Raden Galuh, dadi ngelisang lantas ida ka pamereman. Ditu amapakina lantas katakonin,
"Napi rereh Jerone malih mriki?" Kirangan toya nika? Nggih. Masaut I Jrudeh,
"Nenten, tiang ten ngidih yeh buin, tiang kandikaang mriki nunas api ring Jerone. Dening Gustin tiange makayunan malanjaran tan wen ten api".
"Sira sih gustin Jerone?
"Ida Raden Mantri Koripan nika".
Yening kenten antosang dumun abobos". Majalan lantas panyeroane matur teken Ida Raden Galuh, buat ada parekan, rakanidane Ida Raden Mantri Koripan nunas api. Ngandika Ida Raden Galuh,
"Nah baang ia api, apang enggalan ia magedi, nyen makelo ia dini, tawanga nyen nira dini, kenken ban nira madaya". Dadi baanga lantas I Jrudeh api. Matakon lantas I Jrudeh teken i panyeroan,
"Jero Luh, tiang mataken ring Jerone, sampunang Jeroneng mengkeban ring tiang, i tunian not tiang anak luh ajaka tetelu, sira nika. Gustin jerone nika? Nggih, dados Jerone i wau dingeh tiang matur, Ratu Ayu". Dening suba kabelet pesan kenehne i panyeroan, kene lantas pasautne,
"Nggih Jero, lamun Jerone tan uning ring anake sane tetiga punika tiang ja ngaturin Jerone. Nanging sampunang nyen Jerone ngrewagang, ajerih tiang ring Ida Raden Galuh. Nika sampun arin Gustin Jerone, Ida Raden Galuh daha, Gegelang muah Singasari. Tiang ajak tetelu dados panyeroanida." Keto pasautne i panyeroan, tur ngaturang saindik-indik Ida Raden Galuhe uli pangawit kanti buka jani. Suud i penyeroan ngomong keto, ngenggalang lantas I Jrudeh matulak ngaturang indike ento teken Ida Raden Mantri. Ida Raden Mantri eling ring indik idane i maluan, duke kasangsaran puruse lantang. Taler ida meling ring paindikan ajine.
148
