kayun Ida Sang Prabu kalih Ida Prameswari, dening okane suba mantuk tur larane suba masupat. Ditu lantas Ida Prameswari makarya banten lakar anggen ida naur sesanginidane. Ida Raden Mantri masi karyananga banten pangulapan tur Ida Sang Prabu ngadakang rame-rame. Suba jene suud rame-rame, dening Ida Raden Mantri nu seneng matetulupan, matur lantas ida ring ajine,
"Ratu Guru Aji, tiang jaga lunga matetulupan ngrereh paksi sareng I Punta". Ngandika Ida Sang Prabu,
"Nah, kema Cening luas, nanging da nyen Cening buin male-gendah, tangarin ragane jani, apang da Cening buin buka i pidan!"
"lnggih".
Keto aturne Ida Raden Mantri tur lantas ida mamargi kairing ban I Punta muah juru tulupe. Aketo dogen karyan Ida Raden Mantri sai-sai, kanti suba waneh ida ngrayunang ulam paksi, dening bes sai-saine.
Gelising satua, kacrita suba kone tutug ulanan bobotan Ida Raden Galuh makatetelu di alase, nuju peteng nyakit lantas ida sibarengan. Dadi bincuh panyeroane makatetelu ngencanin Ida raden Galuh, dening bes sibarengari pesan kone gustinne nyakitang weteng. Beh maguyang kone Ida Raden Galuh makatetelu nangis, ane lenan kone nyangetang. Aketo dogen indik idane ditu kanti suba paakan lemah, masih tonden kone embas anake alit. Dening
bas kiapne i panyeroan, dadi pules kone panyeroan makatetelu. Sasubanne pada melah pulesne, tuun lantas dedari tetelu, dedari Kendran, dedari supraba muah dedari Nilotama. Ento jani ngamong Ida Raden Galuh pada mabesik. Sarauhne di pondok Ida Raden Galuhe, ngandika lantas dedari teken Ida Raden Galuh ,
"Putu Galuh, da putu Galuh jejeh teken nira. Nah lamun Putu Galuh tusing nawang, Nini suba dedari uli suargan tuun mai ngalih Putu akar nulungin Putu ngelah panak". Keto kone pada pangandika dedarine teken Ida Raden Galuh ane lenlenan. Jani jemaka kone wetengne Ida Raden Galuh, tur upinina pebaanne ping telu . Buin kejepne ulung lantas ujan bunga ngebekin pondok buin miik ngalub-ngalub. Ngandika dedarine,
"Nah antiang buin akejep dogen, lekad panak Putune. Mara dedarine suud ngandika keto, mengseh kone Ida Raden Galuh buin acepok tur medal lantas okane lanang makatetelu. Sasubanne em bas anake alit, ngandika buin dedarine,
143
