"Adi amonto pedes munyin Beline teken Adi, tra baang kija-kija, masih mamesu. Melah to keto Adi dadi pabalih-balihan di pekene. Ngedalem pesan Beli madingehang pamunyin anake. Ne benang ne, selegang men nunun, da nglesanin."
"Nggih Beli."
Prajanian kone lantas benange ento liinga. Suba pragat ngliing, nganyinin nglantas nyasah. Peteng lemah kone Ni Ketut Waluh nunun tra tuun-tuun.
Gelising satua, buin mani karya, petenge pragat kone saputne. Aturina lantas Ida Raden Mantri, kene aturne,
"Beli, Beli nah niki kampuhang Beli benjang ngayah ka puri. Lamun nagih selanga teken Raden Mantri, da men aturina!" Masaur Ida Raden Mantri,
"Ah sing ada undukan apa Ida Raden Mantri makarsa nyelang saput teken Beli. Di puri masa kuangan kampuh".
Kacrita buin maninne , semengan kone suba ngredeg gong di purian. Empet jejel kone di rurunge ban i panjak neteke nyadia ngaturang pangayah muah mabalih . Nah jani ngandika Ida Raden Mantri teken Ni Ketut Waluh,
"Adi Ketut Waluh, ne kene gejeran anake di rurunge, nyanan da pesan Adi mamesu, apang da buin ngae ngedalem buka i pidan! Beli jani ka puri, ingetang pesan men pamunyin beline."
"Nggih". Keto pasaur Ni Ketut Waluh, mamarga lantas Ida Raden Mantri ka puri makta kampuh pakaryan Ni Ketut Waluhe. Di subanne ida rauh di puri, lantas ida ngranuk payas, lakar maileh, ngilehin puri. Di subanne pragat ida maias tur gegawane makejang suba masanggra, lantas mamargi, Ida Raden Mantri nglinggihin jaran, kairing ban gong muah mamas.
Kacrita Ni Ketut Waluh di taman, dot nonton karyan Ida Sang Prabu, kene kone kayunne.
"Ne dadi aeng ja gredegan anake luas mabalih, apa dogen sih ada di puri. Dot pesan ja i dewek makeneh nawang". Keto kayunne Ni Ketut Waluh tur lantas mamargi. Di subanne rauh di bancingah, dadi kapanggihin Ida Raden Mantri maileh nglinggihin jaran, nangingke tuara kelingan antuka, baane Ida Raden Mantri mapayas magreneng-greneng. Ane kelingan antuka kampuh idane dogen. Kene kayunne Ni Ketut Waluh,
"Be, suba tusing baang ne I Beli maselangang sapute teken
127
