[᭖᭒ 62B]
᭖᭒
ᬤ᭄ᬫᬫᬃᬕ᭄ᬕᬶᬗᬫ᭄ᬧᬓ᭄᭞ᬧᬦ᭄ᬢᭂᬲ᭄ᬢᬶᬗ᭄ᬓᬳᬶᬂᬧᬧᬤᬸ᭞ᬗᭂᬦ᭄ᬤᭀᬦ᭄ᬓᬲᬲᬓ᭄ᬫᬬᬸᬤ᭄ᬥ᭞ᬫᬗᬦ᭄ᬢᬶᬦᬶᬦ᭄᭞ᬫᬲ᭄ᬪᬝᬵᬭᬰᬾᬮᬧᬭᬂ᭟ᬘᬕᭂᬃᬚᬦᬶᬮᬓᬃᬫ᭄ᬫᬂ᭞ᬫᬕ᭄ᬩᬸᬕ᭄ᬓᬩᬜ᭄ᬚᬃᬲᬭᬶ᭞ᬲᬲ᭄ᬯᬓ᭄ᬯᭀᬂᬰᬾᬮᬧᬭᬂ᭞ᬧᬓ᭄ᬭᬶᬫᬶᬓ᭄ᬭᬶᬂᬢᬶᬫ᭄ᬧᬮ᭄ᬳᬶ
ᬧᬸᬦ᭄᭞ᬚᬮᬦ᭄ᬓ᭄ᬫᬫᬚᬚᬭᬄ᭞ᬓ᭄ᬩᭀᬲᬫ᭄ᬧᬶ᭞ᬓᬫ᭄ᬩᬶᬂᬮᬦ᭄ᬫᬶᬲᬕ᭄ᬢᬓᬶᬂ᭟ᬲᭀᬢᬦᬶᬂᬤᬾᬯᬾᬓᬾᬫ᭄ᬦᬂ᭞ᬬᭀᬕ᭄ᬬᬦᬾᬓᬮᬄᬕᬸᬭᬳᬶᬦ᭄᭞ᬫᬲ᭄ᬧᬶᬧᬶᬲ᭄ᬧᬤᬶᬢ᭄ᬦᬳᬦ᭄᭞ᬤᬶᬩᬜ᭄ᬚᬃᬲᬭᬶᬫᬤᬸᬕ᭄ᬤᬸᬕ᭄᭞ᬳᬦᬓ᭄ᬫᬭᬧᬗᬦ᭄ᬢᬾ
ᬦ᭄᭞ᬲᬶᬦᬄᬕᬢᬶ᭞ᬫᬩ᭄ᬓᭂᬮ᭄ᬲᬮᬓᬕᬶᬢᬶᬓᬦ᭄᭟ᬩᬸᬗ᭄ᬕᬫᬲ᭄ᬩᬜ᭄ᬘᬂᬩᬜ᭄ᬘᬗᬦ᭄᭞ᬚᬮᬦ᭄ᬤᬸᬫ᭄ᬧᬥᬫᬓᬢᬶᬄ᭞ᬦᬾᬮᬸᬄᬮᬸᬄᬚᬮᬦ᭄ᬭᭀᬭᭀᬤᬂ᭞ᬦᬾᬲᬧ᭄ᬬᬦ᭄ᬬᬤᬶᬦ᭄ᬦᬾᬩᬮᬸ᭞ᬲᬧᬸᬦᬶᬓᬧᬕᬺᬗ᭄ᬕᭂᬗᬦ᭄᭞ᬲᬂᬦᬸᬮᬸᬗᬶᬦ᭄
᭞ᬦ᭄ᬕᭂᬦ᭄ᬫᭀᬦ᭄ᬤᭀᬂᬩᬩᬦ᭄ᬤᬭᬦ᭄᭟ᬧᬾᬮᭀᬓᬮᬶᬄᬲᬸᬤᬃᬩ᭄ᬪᬬ᭞ᬲᬋᬂᬭᬶᬂᬭᬵᬤᬾᬦ᭄ᬤᬶᬧᬢᬶ᭞ᬲᬵᬫ᭄ᬧᬸᬦ᭄ᬮᬶᬦ᭄ᬢᬶᬂᬧ᭄ᬭᬶᬗ᭄ᬕᬪᬬ᭞ᬕᬕᬜ᭄ᬘᬗᬦ᭄ᬲᬵᬫ᭄ᬧᬸᬦ᭄ᬭᬯᬸᬄ᭞ᬭᬶᬂᬩᬜ᭄ᬘᬶᬗᬄᬰᬾᬮᬧᬭᬂ᭞ᬭᬭᬶᬲ᭄ᬦᬗ᭄ᬓᬶᬮ᭄᭞ᬭᬶᬂᬳᬶᬤᬲᬂ
[᭖᭓ 63A]
ᬫᬸᬦ᭄ᬤᭂᬃᬚᬕᬢ᭄᭟ᬫᬲ᭄ᬪᬝᬵᬭᬰᬾᬮᬧᬭᬂ᭞ᬮᬾᬤᬂᬓᬳ᭄ᬬᬸᬦᬾᬢᬦ᭄ᬲᬶᬧᬶ᭞ᬘᬮᬸᬄᬯᬶᬚᬶᬮᬶᬂᬯᬘᬦ᭞ᬭᬶᬂᬲᬗ᭄ᬓᬮᬶᬄᬯᬳᬸᬭᬯᬸᬄ᭞ᬘ᭄ᬦᬶᬂᬧᬾᬮᭀᬲᬸᬤᬃᬩ᭄ᬪᬬ᭞ᬍᬕᬕᬢᬶ᭞ᬩᬧᬭᬯᬸᬳᬶᬦ᭄ᬳᬶᬤᬾᬯ᭟ᬬᬦ᭄ᬳᬸᬧᬫᬓᬬᬸ
ᬭᬕᬲ᭄᭞ᬓᬸᬚᬦ᭄ᬓᬵᬦᬶᬂᬯ᭄ᬗᬶ᭞ᬧᬬᬸᬫᭂᬦ᭄ᬢᬶᬓ᭄ᬫᬓ᭄ᬤᬧᬦ᭄᭞ᬮᬳᬸᬢᬂᬘ᭄ᬦᬶᬂᬫᬮᬸᬗ᭄ᬕᬸᬄ᭞ᬤᬶᬦᬶᬩᬋᬂᬳᬚᬓ᭄ᬩᬧ᭞ᬢᬶᬢ᭄ᬬᬂᬗᬶᬭᬶᬂ᭞ᬳᬢᬹᬃᬲᬗ᭄ᬓᬮᬶᬄᬓ᭄ᬱᬗᬦ᭄᭟ᬫᬢᬗᬦᬦ᭄ᬦᬸᬦᬲ᭄ᬮᬸᬕᬺ᭞ᬲᬗ᭄ᬓᬮᬶᬄᬦᬵᬫ᭄ᬬᬗᬪᬓ᭄ᬢᬶ᭞ᬧᬺᬦᬵᬣ
ᬫ᭄ᬤᭂᬓ᭄ᬱᬗ᭄ᬓᬢᭀᬂ᭞ᬲᬲᬵᬫ᭄ᬧᬸᬦ᭄ᬳᬢᬢᬾᬂᬮᬸᬗ᭄ᬕᬸᬄ᭞ᬲᬂᬦᬵᬣᬭᬭᬶᬲ᭄ᬗᬦ᭄ᬤᬶᬓ᭞ᬭᬹᬫᬫᬦᬶᬲ᭄᭞ᬘ᭄ᬦᬶᬂᬧᬾᬮᭀᬲᬸᬤᬃᬩ᭄ᬤᬬ᭟ᬢᬸᬮᬸᬂᬩᬧᬳᬚᬓ᭄ᬤᬤ᭄ᬯ᭞ᬯᬶᬮᬰᬾᬫᬶᬦᬾᬤᬶᬦᬶ᭞ᬘ᭄ᬦᬶᬂᬦᬾᬘᬕ᭄ᬭᬂᬩᬧ᭞ᬦᬸᬮᬸᬂᬓᬵᬮᬶᬦᬶᬂᬧᬓᬾᬯᬸᬄ᭞
ᬳᬧᬂᬢ᭄ᬯᬭᬧᬬᬸᬚ᭄ᬗᬄ᭞ᬩᬧᬤᬶᬦᬶ᭞ᬗᬕᬸᬗᬶᬦ᭄ᬤᬶᬰᬾᬮᬧᬭᬂ᭟ᬩᬧᬲ᭄ᬤᭂᬓ᭄ᬓᬓᭀᬩᭂᬢᬦ᭄᭞ᬫᬫᬸᬲᬸᬄᬢ᭄ᬓᬾᬦ᭄ᬯᭀᬂᬩᬵᬮᬶ᭞ᬫᬵᬤᬦ᭄ᬭᬵᬤᬾᬦ᭄ᬩᬜ᭄ᬚᬃᬕ᭄ᬢᬲ᭄᭞ᬫᬉᬫᬄᬤᬶᬩᬜ᭄ᬚᬃᬲᬦ᭄ᬢᬸᬦ᭄᭞ᬭᬭᬶᬲ᭄ᬲᬫᬶᬓᬧᬶᬤᬃᬣ᭞ᬘᬷ
Kaca:Bali-lontar-gaguritan-mas-denda-kuning-300ppi.pdf/63
Kaca puniki sampun kauji-wacén
