[᭒᭕ 25 B]
᭒᭕
ᬓᬸᬄᬦᬾᬮᬦ᭄ᬢᬂᬲᬫᬶ᭞ᬲᬸᬲᬸᬦᬾ ᬮᬫ᭄ᬩᬶᬄᬧᬕ᭄ᬮᬬᬸᬢ᭄᭞ᬧᬚᬮᬦᬾ ᬫᬸᬭᬶᬗᬂ᭞ᬲᬶᬂᬓᬢᭀᬦ᭄ᬧᬘᬂᬚᬕ᭄ᬚᬕᬶᬦ᭄᭞ᬩᭀᬓᬾ ᬩᬭᬓ᭄᭞ᬮᬫ᭄ᬩᬶᬄᬮᬫ᭄ᬩᬶᬄᬫᬩ᭄ᬭᬾᬗ᭄ᬩ᭄ᬭᬾᬗᬦ᭄᭟ᬯᬾᬦ᭄ᬢᭂᬦ᭄ᬓᬤᬶᬚᭂᬫ᭄ᬧᭀᬂ
ᬢᬶᬕᬵ᭞ᬳᬤᬓᬤᬶᬚᭂᬫ᭄ᬧᭀᬂᬓᬸᬜ᭄ᬘᬶᬃ᭞ᬲᬫᬶᬫᬜ᭄ᬚ᭄ᬭᬶᬢ᭄ᬫᬗ᭄ᬭᬓ᭄᭞ᬳᬶᬕᬕᬓ᭄ᬢᬸᬭᬲ᭄ᬫᬗᬶᬮ᭄ᬕᬶᬮ᭄᭞ᬓ᭄ᬚᬮᬓᬸᬤᬶᬚᬤᬶᬦᬶ᭞ᬩᬬᬕᬦ᭄ᬢᬶᬜ᭄ᬚᬦᬶᬮᬫ᭄ᬧᬸᬲ᭄᭞ᬳᬶᬚᬧᬵᬢ᭄ᬯᬦᬵᬗᬸᬘᬧ᭄᭞
ᬲᬫ᭄ᬧᬸᬦ᭄ᬩᭂᬮᬶᬯᬮᬗᬢᬶ᭞ᬦᬶᬓᬶᬲᬵᬫ᭄ᬧᬸᬦ᭄᭞ᬜᬫᬦ᭄ᬩᭂᬮᬶᬫᬓᬧᬢ᭄ᬧᬢ᭄᭟ᬚᭀᬕᭀᬃᬫᬦᬶᬓ᭄ᬗ᭄ᬭᬓᬗᬸᬘᬧ᭄᭞ᬳᬢ᭄ᬫᬧᬭᬦ᭄ᬢ᭄ᬓᬫᬳᬶ᭞ᬤᬾᬦᬕᬯᬾᬭᬳᭂᬤᬶᬗᭀᬂ
ᬤᬶᬰᬲ᭄ᬢ᭄ᬭᬕᬶᬦᬯᬗᬹᬦᬶ᭞ᬲᬭᬢᬶᬓᬨᬮᬦᬾᬓᬶ᭞ᬫᬶᬯᬄᬥᬡ᭄ᬥᬩᬬᬸᬇᬓᬹ᭞ᬳᬶᬚᬧᬵᬢ᭄ᬯᬦᬗᬸᬘᬧ᭄᭞ᬢᬶᬢ᭄ᬬᬂᬩᭀᬬᬳᬢ᭄ᬫᬵᬩ᭄ᬮᬶ᭞ᬚᬤ᭄ᬫᬵᬢᬸᬳᬸᬩ᭄ᬮᬶᬫᬸᬮᬲᬦᬓ᭄ᬢᬶᬢ᭄ᬬᬂ᭟
[᭒᭖ 26 A]
ᬲᬂᬲᬸᬭᬢ᭄ᬫᬗᭂᬤᬾᬓᬂ᭞ᬳᬶᬄᬳᬶᬄᬳᬶᬳᬶᬄᬚᬤ᭄ᬫᬢ᭄ᬯᬶ᭞ᬳᬗᬓᬸᬲᬵᬦᬓᬶᬭᬶᬗᭀᬂ᭞ᬧᬭᬦᬶᬂᬳᬲᬦᬓ᭄ᬤᬤᬶᬯᬭᬳᭂᬦ᭄ᬤᬾᬜ᭄ᬚᬢᬶ᭞ᬬᬦᬶᬗᭀᬂᬢᬦᬦᬯ᭄ᬭᬸᬄ᭞ᬤᬾᬄᬕᬶᬢᬶᬓ᭄ᬚᬶᬦᬱ᭄ᬝᬵ᭞
ᬤᭀᬱᬦᬾᬫᬗᬓᬸᬮ᭄ᬯᬶᬄ᭞ᬤᬸᬤᬸᬲᬦᬓ᭄᭞ᬤᬤᬶᬓᬶᬢᬫᬗᬓᬸᬜᬫᬵ᭟ᬳᬶᬚᬧᬵᬢ᭄ᬯᬦ᭄ᬳᬗᬸᬘᬧ᭄᭞ᬢᬦ᭄ᬤ᭄ᬭᬸᬄᬦᬾᬦᬾᬫᬗ᭄ᬓᬶᬦ᭄ᬩᭂᬮᬶ᭞ᬤᬸᬓᬾ ᬦᬾᬤᬶᬚ᭄ᬭᭀᬦᬶᬂᬕᬃᬩ᭄ᬪ᭞ᬢᬶᬢ᭄ᬬᬂᬲᬋᬂᬳᬚᬓ᭄ᬩᭂ
ᬮᬶ᭞ᬦᬫᬦ᭄ᬩᭂᬮᬶᬦᬾ ᬗᬹᬦᬶ᭞ᬳᬶᬍᬫ᭄ᬩᬤᬵᬳᬩ᭄ᬭᬫᬸᬭᬸᬩ᭄᭞ᬳᬶᬲᬸᬕ᭄ᬬᬦ᭄ᬳᬶᬓᬾᬓᬾᬭᬾᬓ᭄᭞ᬲᬫ᭄ᬧᬸᬦ᭄ᬲᬫᬶᬧᬥᬫᬶᬚᬶᬮ᭄᭞ᬢᬹᬃᬫᬕᭂᬦ᭄ᬢᭀᬲ᭄ᬳᬭᬦ᭄ᬩᭂᬮᬶᬦᬾᬫᬓ᭄ᬚᬂ᭟ᬳᬶᬲᬮᬳᬶᬃᬳᬶ
ᬚᬮᬳᬶᬃ᭞ᬳᬶᬫᭀᬓᬳᬶᬃᬳᬶᬫᬓᬳᬶᬃ᭞ᬳᬭᬦ᭄ᬩᭂᬮᬶᬦᬾ ᬧᬸᬦᬶᬓ᭞ᬲᬫ᭄ᬧᬸᬦ᭄ᬲᬫᬶᬧᬥᬓ᭄ᬮᬶᬄ᭞ᬫᬕᭂᬦ᭄ᬢᭀᬲᬭᬦ᭄ᬩᭂᬮᬶ᭞ᬫᬦ᭄ᬤᬤᬶᬤᬾᬢ᭄ᬬᬧᬸᬦᬶᬓᬸ᭞ᬳᬗ᭄ᬕᬧᬢᬶᬧ᭄ᬭᬚᬧᬢ᭄ᬬ᭞ᬩᬦ
Kaca:Bali-lontar-gaguritan-japatuwan-300ppi.pdf/26
Kaca puniki sampun kauji-wacén
