[᭗᭙ 79B]
᭗᭙
ᬦ᭄ᬓᬩᬾᬳᬶ᭞ᬢᬦ᭄ᬢᬳᭂᬦ᭄ᬢ᭄ᬯᬲᭂᬦ᭄᭞ᬦᬶᬥᬢᬢᬦ᭄ᬧᬗᬸᬤᬶᬮᬶ᭟ᬓᬾᬢᭀᬘ᭄ᬦᬶᬂᬯᬤ᭄ᬯᬭᬵᬓ᭄ᬱᬲᬫ᭠ᬗᬸᬘᬧ᭄᭞ᬮᬫ᭄ᬧ᭄ᬬᬲ᭄ᬗᬚᬓ᭄ᬭᭀᬯᬂᬦᬾᬓᬶ᭞ᬳᬤᬗᬗ᭄ᬕᬃᬧ᭄ᬤᬂ᭞ᬳᬤᬗᬫᭂᬢᬂᬢᬸᬫ᭄ᬮᬓ᭄᭞ᬳᬤᬫᭂᬦ᭄ᬢᬂᬧ᭠
ᬦᬄᬘ᭄ᬦᬶᬂ᭞ᬗᭀᬓᭀᬦ᭄ᬧᬕ᭄ᬭᭀᬕᭀᬄ᭞ᬫᬓᬾᬭᬗᬶᬦ᭄ᬲᬂᬧ᭄ᬭᬵᬧ᭄ᬢᬶ᭟ᬳᬤᬦᬕᬶᬄᬗ᭄ᬚᬸᬓᬶᬤᬢᬸᬃ᭠ᬫᬦ᭄ᬢᬶᬕᬂ᭞ᬳᬤᬦᬕᬶᬄᬫᬫ᭄ᬩᬲᬗᬶᬦ᭄᭞ᬮᬓᬃᬫᬓᬮᬸᬗᬂ᭞ᬳᬤᬦᬕᬶᬄᬫᬜᬓ᭄ᬘᬓ᭄᭞ᬮᬾᬦᬤ
ᬦᬕᬶᬄᬗ᭄ᬭᬜ᭄ᬚᬗᬶᬦ᭄᭞ᬳᬶᬤᬲᬂᬦᬓᬸᬮ᭞ᬳᬾᬭᬂᬓᬬᬸᬦᬾᬢᬦ᭄ᬲᬶᬧᬶ᭟ᬲᬂᬲᬤᬾᬯᬓ᭄ᬭᭀᬦ᭄ᬤᬢᬦ᭄ᬢᬳᭂᬦ᭄ᬢ᭄ᬯᬲ᭄᭞ᬫᭂᬦ᭄ᬢᬂᬧᬦᬄᬳᬶᬤᬕ᭄ᬮᬶᬲ᭄᭞ᬢᬸᬃᬫᬤᬶᬯᬓᬂ᭞ᬯᬤ᭄ᬯᬤᬦᬯᬓᬧᬦᬄ᭞ᬲᬶᬂᬓ᭄ᬦᬗ᭄ᬫ
ᬲᬶᬦ᭄ᬫᬵᬢᬶ᭞ᬤᬸᬮᬸᬭᬶᬦ᭄ᬦᬓᬸᬮ᭞ᬩᬋᬂᬗᬶᬤᬫᬫᬦᬳᬶᬦ᭄᭟ᬧᬚᭀᬮᬾᬫ᭄ᬧᬂᬩᬗ᭄ᬓᬾᬦ᭄ᬤᬦᬯᬦᬾᬓᬢᬄ᭞ᬲᬶᬲᬦ᭄ᬫᬵᬢᬶᬕᬮᬓ᭄ᬲ᭄ᬗᬶᬢ᭄᭞ᬭᬫᬾᬲᬂᬫᬲᬶᬬᬢ᭄᭞ᬲᬂᬓᬺᬱ᭄ᬡᬫᭂᬡ᭄ᬢᬂᬘᬓ᭄ᬭ᭞ᬪᬕᬯᬵ
[᭘᭐ 80A]
ᬦ᭄ᬲᬦ᭄ᬢᬦᬸᬫᬹᬃᬢᬶ᭞ᬓᬧᬢᬶᬢᬶᬲᬂ᭞ᬯᬶᬚᬗᬶᬤᬓᬧᬦᬳᬶᬦ᭄᭟ᬫᬦ᭄ᬤᬮ᭄ᬓᭂᬧ᭄ᬘᬓ᭄ᬭᬦᬶᬤᬢᬦ᭄ᬦᬢ᭄ᬯᬂ᭞ᬓᬳᬫ᭄ᬩᭂᬮ᭄ᬤᬾᬲᬋᬱᬶ᭞ᬢᬸᬃᬗᬦ᭄ᬤᬶᬓᬩᬦ᭄ᬩᬦ᭄᭞ᬳᬶᬄᬓᬺᬱ᭄ᬡᬤᬤᬶᬯᬶᬭᬂ᭞ᬢᬦ᭄ᬧᬕᬸᬡᬘᬓ᭄ᬭᬦ᭄ᬬᬾ
ᬓᬶ᭞ᬳᬲᬦᬓᬸᬫᬯᬵᬲ᭄᭞ᬯ᭄ᬭᬸᬄᬭᬶᬘᬓ᭄ᬭᬦ᭄ᬢᬰᬓ᭄ᬢᬶ᭟ᬮᬯᬦ᭄ᬓᬸᬯ᭄ᬭᬸᬧᬫᬸᬤᬄᬲᬃᬯ᭄ᬯᬲᬜ᭄ᬚᬢ᭞᭠ᬫ᭄ᬯᬂᬧᬫᬸᬦᬄᬲᬃᬯ᭄ᬯᬰᬓ᭄ᬢᬶ᭞ᬓᬶᬢᬰᬓ᭄ᬢᬶᬯᬶᬤᬕ᭄ᬥ᭞ᬭᬶᬗᬚᬶᬥᬦᬹᬃᬯᬾᬤ᭞ᬫᬗ᭄ᬓᬾᬢᬦ᭄ᬧᬕᬸᬡᬲᬫᬶ᭞
ᬮᬶᬮᬂᬢ᭄ᬧᬯ᭄ᬓᬲ᭄᭞ᬘᬶᬳ᭄ᬦᬫᬗ᭄ᬫᬲᬶᬦ᭄ᬫᬵᬢᬶ᭟ᬬᬦ᭄ᬢᬦ᭄ᬓᬫᬸᬫᬦᭂᬫ᭄ᬩᬄᬗᬸᬲᬧᬶᬧᬤ᭞ᬧᬤᬶ᭠ᬗᭂᬳᬂᬚᬦᬶᬘ᭄ᬦᬶᬂ᭞ᬧ᭄ᬓᬓ᭄ᬫᬜᬢ᭄ᬯᬬᬂ᭞ᬳᬶᬦ᭄ᬤᬶᬓᬶᬤᬪᬕᬯᬵᬦ᭄᭞ᬫᬫᬹᬚᬚ᭄ᬜᬦᬲᬶᬤ᭄ᬥᬶ᭞ᬯᬶᬰᬾᬱᬲᬹ
ᬓ᭄ᬱ᭄ᬫ᭞ᬦᬾᬫᬗᬭᬦ᭄ᬧᬜ᭄ᬚᬭᬯ᭄ᬗᬶ᭟ᬓᬢᬶᬯᬓᬂᬓᬢᬗ᭄ᬓᭂᬩ᭄ᬧ᭄ᬢᭂᬂᬲᬂᬓᬺᬱ᭄ᬡ᭞ᬢᬦ᭄ᬯᬶᬓᬦ᭄ᬤᬰᬤᬶᬰᬶ᭞ᬧ᭄ᬢᭂᬂᬫᬮᬶᬫᬸᬦᬦ᭄᭞ᬭᬲᬓᬢᬶᬗ᭄ᬕᬮᬦ᭄ᬚᬷᬯ᭞ᬢᬸᬫᬸᬮᬶᬗᬦ᭄ᬤᬶᬓᬳᬭᬶᬲ᭄᭞ᬲᬶᬗ᭄ᬕᬶᬄᬪᬕᬯᬵ
Kaca:Bali-lontar-gaguritan-gde-upeksa-300ppi.pdf/80
Kaca puniki sampun kauji-wacén
