[᭔᭖ 46B]
᭔᭖
ᬮᬾᬫᬢᭂᬧᬓ᭄᭞ᬫᬤᬗ᭄ᬤᬸᬢ᭄ᬳᬯᬸᬭᬳᬦ᭄᭞ᬢ᭄ᬥᬸᬦ᭄ᬯᭀᬂᬤᬾᬰᬦᬾᬲᬫᬶ᭞ᬲᬳᬲᬜ᭄ᬚᬢ᭄ᬣᬵ᭞ᬧᬤᬵᬲᬮᬾᬂᬢᬓᭀᬦᬶᬦ᭄᭟᭜᭟ᬳᬧᬳᬤᬵᬲᬗ᭄ᬓᬦ᭄ᬓᬸᬮ᭄ᬓᬸᬮᬾᬧᬤᬾᬂᬤᬂ᭞ᬳᬤᬮᬦ᭄ᬢᬲ᭄ᬜᬯᬹᬭᬶᬦ᭄᭞ᬳᬤᬫᬸᬲᬸᬄᬢ᭄ᬓ᭞ᬭᬓ᭄ᬱᬲᬮᬶᬯᬢ᭄ᬕᬮᬓ᭄᭞ᬧᬤᬾᬰᬦᬾᬲᬸᬩᬩᬺᬲᬶᬄ᭞ᬳᬫᬄᬭᬓ᭄ᬱᬲ
᭞ᬦᬄᬚᬮᬦ᭄ᬓᬾᬚᬕ᭄ᬚᬕᬶᬦ᭄᭟᭜᭟ᬳᬤᬧᭂᬳᭂᬦ᭄ᬤᭂᬳᬦ᭄ᬧᭂᬲᬸᬮᬗᬦᬶᬸᬄᬮᬗᬄ᭞ᬤᬾᬦᬶᬂᬚᬢ᭄ᬫᬵᬳᬓᬶᬤᬶᬓ᭄᭞ᬦᬾᬦᬾᬓᬭᬶᬚᬸᬫᬄ᭞ᬮᬶᬬᬸᬦᬦᬾᬦᬾᬮᬸᬯᬲ᭄᭞ᬫᬗᬶᬭᬶᬂᬭᬳᬤᬾᬦ᭄ᬓᬮᬶᬄ᭞ᬓᬓᬶᬦ᭄ᬢᬵᬯᬦᬵ᭞ᬫᬚᬚᬭᬄᬤᬶᬧᬸᬭᬶ᭟᭜᭟ᬚᬦᬶᬲᬸᬩᬓᬩᬸᬦ᭄ᬢᭂᬄᬚ᭄ᬭᭀᬦᬶᬂᬦᬕᬭ᭞ᬳᬾᬯᭂᬄᬳᬶ
ᬤᬵᬲᬗᬚᬶ᭞ᬢ᭄ᬯᬭᬵᬧᬸᬭᬸᬦ᭄ᬫᭂᬤᬮ᭄᭞ᬫᬸᬜᬶᬦ᭄ᬩᭂᬤᬶᬮᬾᬓᬧᬄ᭞ᬓᬘᬭᬶᬢᬭᬤᬾᬦ᭄ᬓᬮᬶᬄ᭞ᬤᬶᬓᬶᬦ᭄ᬢᬵᬯᬦᬵ᭞ᬲ᭄ᬥᭂᬓ᭄ᬳᬶᬤᬵᬫᬮᬶᬗ᭄ᬕᬶᬄ᭟᭜᭟ᬲᬶᬭᬵᬧᬢᬶᬄᬫᬵᬢᬹᬃᬭᬶᬂᬲᬂᬪᭀᬕᬬᬓ᭄ᬱ᭞ᬢᬶᬢ᭄ᬬᬂᬫᬶᬭᬕᬶᬳᭀᬃᬢ᭄ᬣᬶ᭞ᬦᬕᬭᬦ᭄ᬳᬶᬤᬾᬯᬵ᭞ᬓᬭᬶᬱ᭄ᬝᬳᬦ᭄ᬢᬸᬓ᭄ᬤᬾᬢ᭄ᬬ᭞ᬦᬸᬦᬲ᭄ᬓᬾᬭᬵᬢᬹᬚᬕ᭄ᬚᬕᬶ
ᬦ᭄᭞ᬭᬤ᭄ᬬᬦ᭄ᬗᬦ᭄ᬤᬶᬓ᭞ᬦᬄᬚᬮᬦ᭄ᬳᬧᬂᬕ᭄ᬮᬶᬲ᭄᭟᭜᭟ᬯᬸᬲᬬᬕᬭᬤᬾᬦ᭄ᬩᭀᬕᬬᬓ᭄ᬱ᭞ᬫ᭄ᬯᬂᬭᬳᬶᬪᭀᬕᬬᬓ᭄ᬱᬶ᭞ᬢᬸᬫᬸ᭠ᬮᬶᬫᬫᬃᬕ᭄ᬕ᭞ᬲᬶᬓᭂᬧᬾᬲᬫᬶᬩᬸᬤᬮ᭄᭞ᬧᬤᬵᬕᬕᬗ᭄ᬲᬭᬦ᭄ᬫᬫᬃᬕ᭄ᬕᬶ᭞ᬳ᭄ᬦᭂᬂᬭᬳᬤ᭄ᬬᬦ᭄᭞ᬓᭀᬘᬧ᭄ᬳᬶᬬᬫ᭄ᬩᬃᬓᬯᬶ᭟᭜᭟ᬫᬗ᭄ᬓᬶᬦ᭄ᬲᬫ᭄ᬧᬸᬦ᭄ᬫ᭄ᬤᬮ᭄ᬲ
[᭔᭗ 47A]
᭔᭗
ᬓᬶᬂᬚ᭄ᬭᬾᬦᬶᬂᬳᬮᬲ᭄᭞ᬲᬋᬂᬭᬳᬤᬾᬦ᭄ᬤᬾᬯᬶ᭞ᬓᬮᬯᬦ᭄ᬦᬶᬗᭂᬫ᭄ᬩᬦ᭄᭞ᬦᬶᬫ᭄ᬦᬸᬄᬮᬦ᭄ᬦᬶᬲᬦ᭄ᬤᬢ᭄᭞ᬦᬶᬗᬶᬦ᭄ᬢᬾᬫᬶᬯᬄᬳᬶᬲᬗ᭄ᬕᬶᬢ᭄᭞ᬮᬦ᭄ᬦᬶᬳᬗ᭄ᬲᭀᬓ᭞ᬕᬕᬗ᭄ᬲᬭᬦ᭄ᬫᬫᬃᬕ᭄ᬕᬶ᭟᭜᭟ᬲᬭᬯᬸᬳᬾᬭᬶᬮᬬᭀᬦᬾᬰ᭄ᬭᬶᬦᬭᬾᬡ᭄ᬥ᭄ᬭ᭞ᬭᬤᬾᬦ᭄ᬤᬾᬯᬶᬫᬦᬗᬶᬲ᭄᭞ᬫᬕᬸᬬᬂᬤᬶᬦᬢᬃ᭞ᬮ᭠
ᬦ᭄ᬓᬯᬸᬮᬦᬾᬲᬫ᭄ᬬᬦ᭄᭞ᬬᬫ᭄ᬩᬃᬓᬯᬶᬜᭂᬫᬓ᭄ᬕᭂᬮᬶᬲ᭄᭞ᬘᬘᬸᬧᬸᬳ᭄ᬫᬵᬲ᭄᭞ᬫᬤᬕᬶᬂᬩᬜᬸᬳᬸᬭᬶᬧ᭄᭟᭜᭟ᬳᬶᬬᬫ᭄ᬩᬃᬓᬯᬶᬭᬭᬶᬲ᭄ᬕᭂᬮᬶ᭠ᬲ᭄ᬗᭂᬢᬶᬲᬂ᭞ᬩᬜᬸᬳᬸᬭᬶᬧᬾᬫᬗ᭄ᬓᬶᬦ᭄᭞ᬭᬶᬂᬮᬬᭀᬦ᭄ᬦᬾᬲᬂᬦᬵᬣ᭞ᬫᬶᬯᬄᬭᬶᬂᬧ᭄ᬭᬫᬶᬲ᭄ᬯᬭ᭄ᬬ᭞ᬫᬶᬯᬄᬮᬬᭀᬦᬾᬢ᭄ᬯᬦ᭄ᬫᬦ᭄ᬢ᭄ᬭᬶ᭞ᬫᬓᬢᬢᬶᬕ᭞ᬯᬸᬲᬫᬶᬳᬸᬭᬶᬧ᭄ᬫ
ᬮᬶᬄ᭟᭜᭟ᬭᬭᬶᬲ᭄ᬦᬦᭂᬂᬳᬶᬤᬵᬩ᭄ᬗᭀᬂᬫᬗᬯᬲᬂ᭞ᬓᬢᬶᬗᬮᬦ᭄ᬲᬂᬤᬾᬯᬶ᭞ᬦᬶᬗᭂᬫ᭄ᬩᬦ᭄ᬫᬢᬹᬭᬵ᭞ᬦᬸᬦᬲ᭄ᬭᬢᬹᬓᬧᬸᬭ᭄ᬬᬦ᭄᭞ᬲᬂᬧ᭄ᬭᬪᬹᬓᬢᬸᬦ᭄ᬢᬸᬦ᭄ᬫᬗ᭄ᬓᬶᬦ᭄᭞ᬩᬦ᭄ᬧᬭᬳᭂᬫ᭄ᬩᬦ᭄᭞ᬫᬶᬯᬄᬭᬳᬤᬾᬦ᭄ᬤᬾᬯᬶ᭟᭜᭟ᬳᬶᬬᬫ᭄ᬩᬃᬓᬯᬶᬫᬚᬚᬃᬮᬯᬦ᭄ᬲᬂᬤᬾᬯ᭄ᬬ᭞ᬫᬾᬮᬶᬂᬰ᭄ᬭᬶᬦᬭᬧᬢᬶ᭞ᬭᬶᬂᬳᬶ
ᬬᬫ᭄ᬩᬃᬓᬯ᭄ᬬ᭞ᬲᬂᬧ᭄ᬭᬪᬹᬫᬗᬦ᭄ᬤᬶᬓ᭞ᬓᬲ᭄ᬯᬾᬦ᭄ᬳᬶᬤᬵᬳᬶᬘᬮ᭄ᬕᬸᬲ᭄ᬢᬶ᭞ᬩᬲ᭄ᬢᭀᬂᬫᬤᬬ᭞ᬩᬧᬫᬮᬶᬄᬓᬧᬗ᭄ᬕᬶᬄ᭟᭜᭟ᬭᬤᬾᬦ᭄ᬤᬾᬯᬶᬭᬭᬶᬲ᭄ᬳᬶᬤᬵᬫᬵᬢᬹᬃᬦᭂᬫ᭄ᬩᬄ᭞ᬲᬧᬲᬶᬭᬵᬧᬸᬦᬶᬓᬶ᭞ᬲᬂᬦᬵᬣᬗᬦ᭄ᬤᬶᬓ᭞ᬤᬸᬄᬜᬳᬶᬧᬦᬓ᭄ᬩᬧᬵ᭞ᬦᬾᬫᬶᬲᬦ᭄ᬳᬶᬤᬾᬯᬵᬫᬦᬶᬓ᭄᭞ᬦᬾᬫᬮᬸᬳᬶᬮᬂ᭞ᬩᬬᬢ᭄ᬬᬄ
