Kaca puniki kavalidasi
Tresnane Mabunga Mati
SANGKET BUNGA
Anginé ngesir ngampehang bunga
gojar-gojar ngejuk sisan suung
makeliah galang ngentungang ambu
malaib nyeluksuk kesunia rasa
bengong tiang
nuptupang bayu
masogsag saling kejitin
gulemé magarang
ngangkebin énteran surya
kanti engsap ngetelang ujan
ngetisin jagat sayah
tiang bengong patigadab
bingungang kesiuhan miyik
dija alih tiang
munduk jimbar nanging aking
payu buung maboréh liang
sawiréh palohé likad
sing sida ngepik muncuk biu
cara saru cara saja
gununge tempuh angin
ngelinus....
88
