Om Awenam Astu
Pinih rihin titiang ngaturang pangayu bagia majeng ring Ida Sang Hyang Widi Wasa santukan titiang sampun presida ngaripta pupulan puisi sané mamurda” TRESNANE MABUNGA MATI“. Kawéntenan pupulan puisi_ puniki antuk titiang nuptupang damuh tengai sané nyantul ring muncuk sarin keneh titiang, sané meliah ngedut-ngedut manah nundén nuptupang apang dadi puisi sané murdain titiang “ Tresnané Mabunga Mati”
Sané kamunggahang ring pupulan puisi puniki utawi sané dados angkian wantah pemargin kedutan manah ida dané ring masyarakat tua bajang cerik kelih lan para pangénter jagat sané maurab suka duka sadina-dina. Nika sané tuptupang titiang maka pamungah manah pusang sing karoan tongos aon pules magaleng sedih masaput sakit ati salantang lemah
Yan pautang ring pakaryan sang Rakawi minab tan wénten pikenohné reriptan titiang puniki santukan banget doh wigunanné. Diastu asapunika titiang banget rumasa subagia, santukan titiang sampun presida nutug pamargin sang sané sampun pascad. Antuk punika, patut pisan titiang ring tepengané mangkin ngaturang parama suksma marep ring Bapak Kepala Balai Bahasa Provinsi Bali sané tulus asih nekéng toas ngicén ketélan wacana. Bapak Made Purwa, Bapak ida Bagus Maha Indra sané ngicén pamargi luih taler ibu bapak sané lianan ring Balai Bahasa sané tulus sareng ngastitiang
v
